काठमाडौं– म्यानमारकी प्रजातन्त्रवादी नेता तथा नोबेल शान्ति पुरस्कार विजेता आङ सान सुकीलाई सैनिक सरकारको अदालतले चार वर्षको जेल सजाय सुनाएको छ ।
समाचार संस्था एएफपीका अनुसार सरकार प्रवक्ताले ७६ वर्षीया सुकीलाई चार वर्ष जेल सजाय हुने जानकारी दिएका हुन् । सोमबार एक अदालतले सुकीलाई सेनाविरुद्ध नागरिकलाई भड्काएको, कोभिड–१९ रोकथामका मापदण्ड उल्लंघन गरेको आरोपमा दोषी ठहर गर्दै जेल सजाय सुनाएको हो ।
सेनाले उनीमाथि भ्रष्टाचार गरेको, गैरकानुनी रूपमा वाकीटकी राखेकोलगायतका आरोप लगाएको छ । सुकीमाथि लागेका सबै अभियोगमा अदालतले उनलाई दोषी ठहर्याए उनले आजीवन काराबासको सजाय पाउनेछन् ।
गत वर्ष फेब्रुअरी १ मा म्यानमारको सेनाले जननिर्वाचित सरकारलाई अपदस्त गरेर सुकीलाई नियन्त्रणमा लिएको थियो । त्यसयता उनी सार्वजनिक रूपमा देखिएकी छैनन् भने बन्दकोठाभित्र उनको मुद्दाको सुनुवाइ भएको थियो ।
सैनिक कु हुनु केही महिनाअघि गत वर्षको नोभेम्बरमा भएको आमनिर्वाचनमा धाँधली भएको भन्दै सेनाले प्रजातान्त्रिक सरकार बर्खास्त गरी शासन आप्mनो नियन्त्रणमा लिएको थियो । उक्त चुनावमा सुकीको नेसनल लिग फर डेमोक्रेसी (एनएलडी)ले बहुमत ल्याएको थियो ।
सेनाले कु गरेपछि प्रजातन्त्र वहालीको माग राख्दै म्यानमारमा दिनहुँ प्रदर्शन भइरहेका छन् । प्रदर्शनका क्रममा सेनाको दमनमा परी हालसम्म १३ सय बढी नागरिकले ज्यान गुमाइसकेका छन् । अदालतको निर्णयपछि विश्व समुदायले निन्दा गरेको छ ।