आलिताल गाउँपालिका–१ का वडाध्यक्ष यज्ञबहादुर देउवा स्थानीयका लागि सबैभन्दा नजिकको सरकार प्रमुख हुन् । उनी नेपाल कम्युनिस्ट पार्टी (एमाले) बाट वडाध्यक्षमा निर्वाचित भएका हुन् । वडाध्यक्षको जिम्मेवारी सम्हालिरहँदा उनले आफू कृषकको सबैभन्दा नजिकको पहरेदारको रूपमा बुझेका छन् । कृषि क्षेत्रको विकासका लागि उनले विभिन्न योजना बनाएका छन् । विभिन्न कार्यक्रम बनाई कुनै लागु गरेका छन् भने कुनै कार्यन्वयनको लाइनमा छन् । देउवाले वडाध्यक्षको जिम्मेवारी सम्हालेका पनि १७ महिना पूरा भइसकेको छ । निर्वाचित भएयता वडाध्यक्ष देउवाले वडाको कृषि क्षेत्रमा गरेको कामको विषयमा पालिकाखबरकी पार्वती साउदले गरेको कुराकानी सम्पादित अंश :

तपाई निर्वाचित भएर जिम्मेवारी सम्हालेपछि आफूले सम्पादन गरेको कामका आधारमा कतिको सन्तुष्ट हुनुहुन्छ ?

मैले निर्वाचित भएयता गरेका काममा सन्तुष्ट नै छु । थुप्रै कामहरू भ्याएसम्म गरिरहेको छु । दिनरात जनताको सेवामा छु । वडामा बिजुली बत्ती पनि ६० प्रतिशत बलेको छ । खानेपानी, सिँचाई, स्वास्थ्यमा जागरूकताका साथ काम गर्दै आएको छु । माला गाउँ र घोगा गाउँमा पहिरो जोखिममा थियो । २४ परिवारलाई उद्धार गरेर एक महिना आधारभूत स्कुलमा राख्यौँ । जिल्ला विपद् व्यवस्थापन समितिबाट निर्णय गरी सिडिओ आफै गृह मन्त्रालयमा गएर उहाँहरूलाई अस्थायी टेन्टको व्यवस्था गरी अर्को गाउँमा राखेका छौँ । उहाँहरूलाई गाउँपालिकाबाट एक लाख खाद्यान्नको लागि छुट्याएका छौँ । 

सामाजिक सुरक्षा भत्ता बुझ्ने आमाबुवा, दाजुभाइ, एकल महिला दिदी बहिनीहरूले नबिल बैंक आलिताल ३०/३५ किलो मिटरको द"रीमा जानुहुन्थ्यो । त्यो भत्ता बुझेर फर्कँदासम्म कि गाडी नपाउने भत्ता लिन जाँदा २ दिन खर्चिनुपर्ने समस्या थियो । त्यो समस्या समाधान गर्नका लागि बैङ्कसँग छलफल गरेर कार्यपालिकाबाट निर्णय गर्‍यो । अहिले बैंकबाट त्रैमासिक रूपमा शनिबार वडामै आएर सामाजिक सुरक्षा भत्ता वितरण गर्न आउनुहुन्छ । सामाजिक सुरक्षा भत्ता बुझ्ने लाभग्राहीलाई एकदमै सहज भएको छ । 

तपाई स्थानीयको सबैभन्दा नजिकको सरकार प्रमुख हुनुहुन्छ । तपाईले कृषकका लागि के कस्ता कार्यक्रमलाई प्राथमिकता दिनु भएको छ ? 

कृषिका लागि २/३ वटा आलु पकेट क्षेत्र छुट्याइएको छ । तर त्यस ठाउँलाई पकेट क्षेत्र बनाउन सिँचाइको समस्या छ । डीआई जेट नामक संस्थाले गाउँपालिकाको सहकार्यमा सिँचाइको काम गर्दैछ । त्यो संस्थाबाट लिफ्ट खानेपानीको दुई वटा आयोजना तयार हुँदैछ । यसपालिको वडाको बजेटमा एक बस्ती एक उत्पादन कार्यक्रम राखेका छौँ । एउटा बस्तीलाई समेटेर त्यहाँको माटो ल्याबमा परीक्षण गरेर माटोमा कुन बाली फस्टाउँछ त्यही किसिमको बाली लगाउँछौ । अर्को वर्ष त्यसै गरेर अर्को बस्तीमा बाली गराउने भन्ने योजना छ।

अन्य के कस्ता कार्यक्रमहरू अगाडि सार्नुभएको छ ?

कृषकका माग अनुसारका सहयोग वडाबाट उपलब्ध गराउने गरेका छौँ । कृषिमा सहुलियत र अनुदानबाहेक बाख्राको लागि चरी चरन राम्रो छ । भेटरेनरीबाट बाख्रा पालनको २/३ वटा समूह बनाएका छौँ । अनि मौरी पालनको व्यावसायिक पकेट ठाउँ हो । यहाँ चिउरी व्यापक फल्छ । मौरीलाई चिउरी मन पर्ने भएकाले चिउरी खेतीतर्फ पनि कृषक आकर्षित गराउने कार्यक्रमहरू छन् । मौसमअनुसारको ताजा तरकारी उत्पादन गर्न कृषक लागेका छन् । 

कृषि उपजको बजारीकरणका लागि योजना के छ ?

स्थानीय गैरा बजार र गोगन पानी बजार यहाँका मुख्य बजार हुन् । जिल्लाको बजार यहाँबाट टाढा छ । सडक सञ्जाललाई विस्तार गरेपछि ट्याक्टरबाट तरकारी ढुवानी गरेर बजारीकरण गर्ने योजना छ ।

कृषिसम्बन्धी कार्यक्रमबाट किसानहरू कति खुसी हुनुहुन्छ?

कृषकका मागअनुसार जिल्ला र पालिकाको सहयोगमा बीउ विजन वितरण गर्ने गरेका छौँ । बालीमा लाग्ने विभिन्न किसिमका रोग नियन्त्रण गरेर कृषि प्राविधिक खटाएका छौँ । स्थानीय कृषकहरू खुसी नै हुनुहुन्छ ।