दार्चुला– सुरक्षाकर्मीको बाह्रैमास उपस्थित भएसँगै दार्चुलाको त्रिदेशीय सीमा नजिकैको छांगरुमा नेपाल टेलिकमको ल्याण्डलाईन सेवा सुविधा पुगेको छ । नेपाल टेलिकमले एन्टी सेट टेलिसेन्टरमार्फत ल्याण्डलाईन सेवा पुर्याएको हो ।

सशस्त्र प्रहरी र स्थानीयलाई लक्षित गर्दै नेपाल टेलिकमको लिज लाईन प्रयोग गर्दै दुई लाईन ल्याण्डलाईन जडान गरिएको टेलिकम दार्चुलाका प्रमुख कृष्णबहादुर गुरुङले जानकारी दिए ।

सशस्त्र प्रहरीलाई प्राथमिकता दिएर सरकारले टेलिकमको लिज लाईन उपलब्ध गराएको हो । सशस्त्र प्रहरीलाई दिएकै लाईन सुविधामार्फत एक लाईन स्थानीयलाई प्रयोग गर्न मिल्ने सुविधा दिइएको छ ।

व्यासको छांगरुमा यो वर्षदेखि सशस्त्र प्रहरी राखेपछि प्रभाकारी सञ्चारको लागि भन्दै ल्याण्डलाईन सुविधा पुर्याएको हो । स्काई टावरमार्फत सञ्चार हुँदै आएको थियो ।

ल्याण्डलाईन जडान भएपछि सशस्त्र प्रहरीको सञ्चारमा मद्यत पुगेको छ । मंसिरबाट हिमपात हुन थाल्छ । हिमपातमा पनि सशस्त्र प्रहरी छांगरुमै बस्ने भएपछि स्काई टावरले काम गर्न सक्ने अवस्था नहुने भएपछि ल्याण्डलाइन प्रभावकारी बन्नेछ ।  

यस्तै व्यासको छांगरुमै नमस्तेको टावर जडानको लागि उपकरण जडान सुरु भएको छ । टेलिकको जगमा टावर राख्ने काम भइरहेको छ ।