बागलुङ– संसारकै लामो मानिएको बागलुङ–पर्वत जोड्ने पुलमा लगाईएको प्रवेश शुल्क बागलुङ नगरपालिकाले फिर्ता लिएको छ । बिहीबार नगर कार्यपालिकाको कार्यालयले सार्वजनिक सूचना मार्फत पुलमा लगाइएको पूर्वाधार उपयोग कर अर्को व्यवस्था नभएसम्मका लागि फिर्ता भएको जनाएको हो ।
७ वैशाखमा चैते दशैंको दिनबाट पूर्वाधार उपयोग करका रुपमा नगरले रकम संकलन गर्न थालेपछि चौतर्फी विरोध भएको थियो । प्रमुख प्रशासकीय अधिकृत जीवन ज्ञवालीले सूचना प्रकाशन गरेर कर लिने काम फिर्ता गरिएको जानकारी गराएका हुन् ।
बागलुङ नगरपालिका वडा नं. १ को रामरेखादेखि पर्वतको पाङ जोड्ने ५ सय ६७ मिटर लामो पुलमा २० रुपैयाँ लिएर प्रवेश गराइएको थियोे । पर्यटकीय दृष्टिले आर्कषक र नौलो भएकोले पर्यटक अनिवार्य पुलमा पुग्न थालेका छन् । सोही अवस्थालाई मध्येनजर गर्दै नगरपालिकाले पुलको मर्मत संभारलगायतका कामको लागि भन्दै पूर्वाधार उपयोग कर लगाएको थियो ।
बागलुङ नगर कार्यपालिकाको बैठकले पुल तरेको शुल्क लिने व्यवस्था गरेको वडा नं. २ का अध्यक्ष जीवन आचार्यले बताए । नगरपालिकाले कर्मचारी समेत खटाएर टिकट काट्ने व्यवस्थापन गरेको थियो । बिहीबार प्रकाशित सूचनासँगै कर्मचारीले पुल नजिकै स्थापना गरेको काउन्टर हटाएका छन् । गत असारमा निर्माण सम्पन्न भएर संचालनमा आएको यो पुल दुई महिनाअघि राष्ट्रिय सभाका अध्यक्ष गणेश तिमिल्सिनाले उद्घाटन गरेका थिए ।
यो पुल बनेपछि पर्वतको पाङ तथा खुरकोटका बासिन्दा बागलुङ बजार आउन र बागलुङका मानिस पर्वत जान सहज भएको छ । यो पुलबाट कालीगण्डकी नदी, धौलागिरी हिमाल लगायतका स्थान देख्न सकिन्छ । थप आर्कषणका लागि बत्ती जडान गरेर राती बल्ने व्यवस्था समेत छ ।
यो पुलको आर्कषक नामाकरण गर्न समेत समिति गठन भएको छ । उक्त समितिले आर्कषक नाम प्रस्ताव गर्नेलाई २५ हजार पुरस्कार दिने निर्णय गरेको छ । पुल तर्दा लिएको शुल्कले नियमित मर्मतका लागि कोष बनाउने र खर्च गर्ने योजना नगरपालिकाले बनाएको थियो ।