रूपन्देही– बुटवल उपमहानगर प्रमुख शिवराज सुवेदीलाई मुक्का प्रहार गर्ने युवक गणेश पंगेनी एक सातापछि धरौटीमा रिहा भएका छन् । जिल्ला प्रशासन कार्यालय रूपन्देहीमा ५ हजार रुपैयाँ धरौटी राखेपछि पंगेनी रिहा भएका हुन् ।

सहायक प्रमुख जिल्ला अधिकारी तथा कार्यालयका प्रवक्ता विजयराज पौडेलले इलाका प्रहरी कार्यालय बुटवलबाट पेस हुन आएको अमर्यादित व्यवहारको मुद्दा हेरेपछि प्रमुख जिल्ला अधिकारी ऋषिराम तिवारीले धरौटीमा छाडेको जानकारी दिए ।  पंगेनीले ४ असोजमा वडा नम्बर ३ ज्योतिनगरको पहिरो अवलोकन गर्न गएका बेला नगर प्रमुख सुवेदीलाई मुक्का हानेका थिए ।

प्रहरीले उनलाई सोही दिन साँझ पक्राउ गरी सार्वजनिक मुद्दा चलाएर अदालतबाट ५ दिने म्याद थप गरि अनुसन्धान गरेको थियो । नगर प्रमुख सुवेदीलाई मुक्का हान्ने पंगेनी बुटवलको ज्योतिनगरका पहिरो पीडित हुन् ।