जुम्ला– मुगु सदरमुकाम गमगढीको तल्लो बजारमा आगलागी हुँदा २१ घर जलेर नष्ट भएका छन् । गए राती १ बजे स्थानीय ठिल्ले लामाको घरमा बल्दै गरेको दियालोबाट आगलागी सुरु भएको प्रारम्भिक सूचना आएको जिल्ला प्रहरी कार्यालय मुगुका प्रहरी नायब उपरीक्षक चित्रबहादुर भट्टराईले जानकारी दिए ।
आगलागीमा परी १८ घर, ३ वटा घुम्ती पसल खरानी भएका छन् भने करोडौँको धनमाल, जिन्सी सामान जलेर नष्ट भएको छ । आगलागीबाट मानवीय क्षति भने नभएको प्रहरीले जनाएको छ । नेपाल प्रहरी, सशस्त्र प्रहरी, नेपाली सेना, नगर प्रहरी र स्थानीयको सहभागितामा आगलागी नियन्त्रणमा आएको छ ।
गए राती १ बजेदेखि सुरु भएको आगलागी बिहान ४ बजे नियन्त्रणमा आएको हो । साँघुरो बाटो, काठबाट निर्मित कच्ची घर एकअर्कासँग जोडिनु र मुगुमा दमकल नहुँदा आगलगानी नियन्त्रणमा समय लागेकाले धेरै क्षति भएको अनुमान छ ।
आगलागीपीडितलाई राहतकोे घोषणा
कर्णाली प्रदेश सरकारले मुगुको गमगढी बजारका आगलागीपीडितलाई राहत दिने घोषणा गरेको छ । मुख्यमन्त्री जीवनबहादुर शाहीले पीडितलाई राहत दिने घोषणा गरेका हुन् ।
मंगलबार बिहान विज्ञप्ति जारी गर्दै उनले अल्पकालीन राहतका लागि स्थानीय प्रशासनलाई निर्देशन दिइसकेको बताए । स्थानीय प्रशासनको सिफारिसका आधारमा प्रदेश सरकारले तत्काल राहत प्याकेज घोषणा गर्ने मुख्यमन्त्री शाहीले जानकारी दिए ।