जुम्ला– आगामी निर्वाचनका लागि निर्वाचन आयोगदेखि राजनीतिक दल तयारीमा जुटेका छन् । राजनीतिक दल आ–आफ्ना पार्टीका भेलादेखि संगठन विस्तार गरी आगामी निर्वाचन जित्ने तयारीमा जुटेको देखिन्छन् । निर्वाचन आयोगजे पनि विभिन्न सरोकारवाला निकायसँग अन्तत्र्रिmया कार्यक्रम गर्दै आएको छ ।
जुम्लामा नागरिकता प्राप्त सबै नागरिकको मतदाता नामावलीमा नाम नभएको पाइएको छ । जिल्ला निर्वाचन कार्यालय जुम्लाको प्रारम्भिक तथ्यांकअनुसार जुम्लाको जम्मा मतदाता संख्या ६९ हजार ३३५ छ भने जिल्ला प्रशासन कार्यालयबाट नागरिकता प्राप्त संख्या ७२ हजार छ ।
यो तथ्यांकलाई हेर्दा आगामी निर्वाचनमा नागरिकता प्राप्त गरेका ३ हजार बढी नागरिकले मतदान गर्न नपाउने भएका छन् । नयाँ ६ हजार २७१ जना मतदाता संख्या थपिएका छन् । गत ३ साउनदेखि २४ माघसम्म जुम्लामा नयाँ फोटोसहितको मतदाता नामावली संकलन भएको थियो । महिला ३ हजार ४० र पुरुष ३ हजार २ सय ३१ जना गरी ६ हजार २७१ जना मतदाता थपिएको निर्वाचन कार्यालय जुम्लाका प्रमुख महेश शर्माले बताए ।
थपिएका ६ हजार २७१ सहित जुम्लामा मतदाता संख्या ६९ हजार ३३५ पुगेको छ । यीमध्ये महिला मतदाता ३३ हजार १३७ र पुरुष मतदाता ३६ हजार १९८ जना छन् । ‘स्थानिय तहको निर्वाचनको तयारीमा जुटिरहेका छाँै’, निर्वाचन अधिकारी शर्माले भने, ‘२४ माघभित्र मतदाता नामावलीमा दर्ता भएका तर २९ वैशाखसम्म १८ वर्ष पुगेका सबै नागरिकले मतदान गर्न पाउनेछन् । विगतमा यस्तो व्यवस्था थिएन । यो प्रारम्भिक तथ्यांक हो । आयोगमा पेस गरेका छौँ । नामावली अद्यावधिक गर्नुपर्छ । दोहोरिएका सच्याउनुपर्छ । पछि थपघट पनि हुन सक्छ ।’
जुम्लामा हालसम्म झन्डै ७२ हजार नागरिकले नागरिकता लिएका छन् । ‘नागरिकता लिएका सबै नागरिकको मतदाता नामावली हुनुपर्ने हो’, प्रमुख जिल्ला अधिकारी विजयाकुमारी प्रसाईंले भनिन्, ‘नागरिकता लिएकामध्ये ३ हजार नागरिक मात्रै मतदाता नामावलीबाट वञ्चित छन् । संकलन हुँदा बखत धेरै मानिस जाडो छल्न तराई झरेकाले पनि छुटेका हुन सक्छन् ।’ भौगोलिक विकटता तथा सूचना अभावले समस्या रहेको उनले बताइन् । जुम्लामा ३ थपसहित जम्मा ७९ वटा मतदान केन्द्र छन् ।