काठमाडौं । निर्वाचन आयोगले स्थानीय तह निर्वाचनको सम्पूर्ण तयारी पूरा भएको बताएको छ । बिहीबार पत्रकार सम्मेलन गरी आयोगका प्रवक्ता सूर्यप्रसाद अर्यालले यस्तो जानकारी दिएका हुन् ।
‘निर्वाचन आयोगले स्थानीय तह सदस्य निर्वाचन, २०७९ वैशाख ३० हुने निर्वाचनको सम्पूर्ण तयारी पूरा गरेको छ,' नियमित पत्रकार सम्मेलनका क्रममा उनले भने ।
केही स्थानीय तहबाहेक शुक्रबार अर्थात् भोलि एकसाथ निर्वाचन हुँदैछ ।
आयोगले निर्वाचन अगावै देशभर विभिन्न राजनीतिक दलका ३५५ जना पदाधिकारी निर्विरोध रूपमा निर्वाचित भएको जनाएको छ । निर्वाचित हुनेहरूमा ६ वडाध्यक्षसहित ३५ स्वतन्त्र उम्मेद्वार सदस्य छन् ।