झापा– ‘तपाईंहरुलाई मैले भोट किन हाल्ने ? दुई वटा कारण छेउको डायरीमा लेखिदिनु होला ।’ नेपाली कांग्रेस मेचीनगर–९ का वडा सभापति उद्धव बानियाँले यी नै हरफ लेखेर आफ्नो घरको भित्तामा टाँसेका छन् ।
उनले अरु इतर दलका नेतालाई नभएर आफ्नै पार्टीको १४औँ राष्ट्रिय महाधिवेशनमा जिल्ला, क्षेत्र तथा केन्द्रीय महाधिवेशन प्रतिनिधिमा उम्मेदवारी घोषणा गरेर भोट माग्दै कार्यकर्ताको घरदैलोमा पुग्ने नेताहरुलाई भनेका हुन् ।
उनले बिहीदेखि सूचना मात्र टाँसेका मात्र छैनन्, भोट माग्न आउने नेतालाई जित्ने आधारसहित आफ्ना सङ्कल्प लेखिदिनु भनेर डायरी र कलमसमेत राखिदिएका छन् । आफ्नो घरमा आउने नेता तथा उम्मेदवारलाई सधैँ स्वागत गर्ने भन्दै उनले पार्टीको विभिन्न पदमा उम्मेदवारी घोषणा गर्नेबाट उत्तर खोज्ने प्रयास गरेको बताए ।
उनी भन्छन्, ‘उम्मेदवारी घोषणा गर्नुमात्रै ठूलो कुरा होइन, उम्मेदवारले सङ्कल्प गर्नैपर्छ पार्टी र सङ्गठनलाई यस्तो बनाउँछु भनेर ।’ उनले पार्टी र जनताको काममा आफू सधैँ निरन्तर खटिरहेको र आफूले पनि त्यस्तै नेताहरु नेतृत्वमा हेर्न चाहेको बताए ।
उनले वर्षौंदेखि पार्टीमा योगदान पुर्याएका मान्छेहरुको अवमूल्यन हुने, पार्टी र सङ्गठन नै नबुझेका नयाँ सदस्य हावी हुने अवस्था सिर्जना हुन नदिन यो अभियान सुरु गरेको बताए । वडा सभापति बानियाँले भोट माग्न आउने तर डायरीमा उम्मेदवार बन्नुका कारण नखुलाउने नेताहरुलाई आफूले भोट नहाल्ने बताए ।