हेटौँडा– बागमती प्रदेशका मुख्यमन्त्री डोरमणि पौडेलले डोजर चलाएर सडक खनेर मात्र विकास नहुने बताएका छन् ।

मकवानपुरका १० वटै पालिकाका प्रमुखसहित सबै जनप्रतिनिधि एकै पटक भेला भएको अवसरमा मुख्यमन्त्री पौडेलले विकासको पूर्वाधार भनेको डोजरले सडक बनाउनु मात्र नभएको बुझ्न आग्रह गरेका हुन् ।

उनले सडक खनेर मात्र नभई जनताले अनुभूति गर्ने खालका पूर्वाधार तयार गर्नुपर्ने बताए । मुख्यमन्त्री पौडेलले वडा समितिमार्फत सिफारिस गरिएका योजनालाई प्रभावकारी कार्यान्वयन गर्न स्थानीय तहलाई निर्देशन पनि दिएका छन् ।

‘जनप्रतिनिधिलाई मोरो आग्रह छ । डोजरले सडक खेर मात्र विकास हुने होइन । जनताले प्रत्यक्ष लाभ लिने खालका विकास गर्नुपर्छ’, पौडेलले भने । जिल्ला समन्वय समितिको वार्षिक समीक्षा बैठकलाई सम्बोधन गर्दै उनले झोलुङ्गे पुल, कृषि सडक, सिँचाइ, ग्रामीण विद्युतीकरणको पक्षमा प्रदेश सरकारले आफ्नो स्रोत, साधन परिचालन गरिरहेको बताए ।

पौडेलले राज्यका तीन तहका सरकारले एकले अर्कोलाई खुइल्याउने प्रवृत्ति अन्त्य गरिनुपर्ने पनि बताए । ‘एउटा सरकारले अर्कोलाई खुइल्याउने काम भइरहेको छ । यो कसैलाई फलदायी हुँदैन । तीनै सरकार मिलेर अघि बढे मात्र लक्ष्यमा पुगिन्छ’, उनले भने ।

तीनै तहका सरकार मिले मात्र विकास गर्न सकिने उनको धारणा छ । विकास निर्माणका योजना छनोटमा तीनै तहका सरकारको समन्वय भए मात्र सही र आवश्यक योजनाहरू छनोट हुने उनको भनाइ छ ।

पौडेलले गाँजाखेतीलाई वैधानिकता दिनुपर्ने विषय संसदमा उठान गरिरहेका जनप्रतिनिधिलाई लक्षित गरी अवैधानिक कार्यमा प्रोत्साहन गरिरहेको आरोप लगाएका छन् । ‘सरकारले अवैध ठहर गरेको गाँजा उत्पादनलाई जनप्रतिनिधि स्वयंले  प्रोत्साहन गर्नु गलत हो । सरकारमै रहेका जनप्रतिनिधिले गरिब, विपन्न किसानलाई कानुनमै अवैध उल्लेख गरेको गाँजाखेती गर्न प्रोत्साहन दिनु जायज होइन’, उनले भने ।

गाँजा उत्पादन हुने क्षेत्रमै पुगेर जनप्रतिनिधिले विपन्न किसानलाई प्रोत्साहन गरिरहेको आरोप मुख्यमन्त्री पौडेलको छ । गाँजाखेती गर्न प्रोत्साहन गर्नुभन्दा कानुन परिवर्तनमा जोड दिनुपर्ने तर्क पौडेलको छ । कानुन परिवर्तन गरेर वैधानिकता दिन सके गरिब किसान जेल जानबाट जोगिने भनाइ उनले राखे ।

मुख्यमन्त्री पौडेलले मुलुकमा संघीयता कार्यान्वयनका लागि तीनै तहका सरकारको सहकार्य अपरिहार्य रहेको जनाए । कानुनको बर्खिलाप हुने गरी कसैले काम गर्न नहुने धारणा उनको छ ।

कोरोना महामारीको समयमा संघीय र प्रदेश सरकारले निर्देशन मात्र दियो बजेट दिएन भन्ने भनाइप्रति आपत्ति जनाउँदै मुख्यमन्त्री पौडेलले जनप्रतिनिधिलाई प्रतिप्रश्न गरे, ‘अहिले पाइरहेको बजेट कसको हो ?’