हेटौंडा– बागमती प्रदेशका ६७ वटा गाउँपालिकामा प्रदेश प्रहरी कार्यालय, हेटौंडाले गुनासो तथा सुझाव संकलनका लागि उजुरी पेटिका राखेको छ ।

प्रहरी कार्यालय र प्रहरीबाट सम्पादन भएका कामकारबाहीका बारेमा नागरिकबाट प्राप्त सल्लाह, सुझाव र गुनासो सम्बोधन गर्न प्रदेश प्रहरीले सबै स्थानीय तहमा गुनासो पेटिका राखेको हो ।

कार्यालयले दोस्रो चरणको कार्यक्रमअन्तर्गत सबै गाँउपालिकाहरुमा गुनासो तथा सुझाव संकलन पेटिका राखिएको कार्यालयका सूचना समन्वय अधिकृत प्रहरी निरीक्षक रोशन थापाले जानकारी दिए ।

प्रदेश प्रहरी कार्यालयले यसअघि प्रथम चरणको कार्यक्रमअन्तर्गत प्रदेशका १० वटा जिल्लाका (उपत्यकाका काठमाडौं, ललितपु र भक्तपुर बाहेक) एउटा महानगरपालिका, एउटा उपमहानगरपालिका, २५ नगरपालिका र सदरमुकाममा रहेको एक गाउँपालिका गरी ३१ वटा स्थानीय तहमा गुनासो तथा सुझाव संकलन पेटिका राखेको थियो । तेस्रो चरणमा प्रदेशका ८ सय ७४ वटा वडाहरुमा गुनासो संकलन पेटिका राखिने सूचना समन्वय अधिकृत थापाले जानकारी दिए ।

प्रथम र दोस्रो चरणमा गरी प्रदेशभरका ९८ वटा स्थानीय तहमा गुनासो तथा सुझाव संकलन पेटिका राखिएको हो । नागरिकबाट प्राप्त हुने गुनासो तथा सुझावलाई व्यवस्थित र तत्कालै सम्बोधन गर्ने उद्देश्य अनुरुप प्रदेश प्रहरी कार्यालयले सुझाव पेटिका संचालन सम्बन्धी कार्ययोजना २०७७ तयार पारेको थियो ।

हरेक प्रहरी कार्यालयहरुमा उजुरी पेटिका  भएपनि नागरिकको सहज पुहँचमा नभएको र प्रहरी कार्यालयमै प्रहरीेविरुद्ध उजुरी गर्न सेवाग्राहीले असहज महशुस गर्ने भएकाले पालिकाहरुमा पेटिका राखिएको हो ।

नागरिकहरुले गर्ने गुनासो तथा सुझावलाई प्रदेश प्रहरी कार्यालयले हरेक महिनाको १ गते स्थानीय तहका प्रतिनिधि र स्थानीय प्रहरीको रोहबरमा संकलन गर्ने गरेको छ । नागरिकका गुनासा र सुझाव सम्बोधनका लागि कार्यालयमा उजुरी छानबिन शाखा समेत स्थापना गरिएको छ । कार्यालयले गुनासो तथा सुझाव सम्बोधन गरेपनि उजुरीकर्ता व्यक्ति स्वयमलाई कामकारबाहीका बारेमा जानकारी गराउने गर्दछ ।

प्रहरीसँग सम्बन्धित नरहेका कुनै गुनासो तथा सुझावलाई भने सम्बन्धित निकायमा कार्यान्वयनका लागि पठाइने प्रदेश प्रहरी कार्यालयले जानकारी दिएको छ । प्रदेशका नागरिकले असोज र कार्तिकमा गरी १० वटा गुनासो तथा सुझाव हालेका थिए । उक्त १० वटा उजुरीको कार्यालयले कार्यान्वयन गरिसकेको सूचना समन्वय अधिकृत थापाले जानकारी दिए ।