महोत्तरी- महोत्तरीको सोनमा गाउँपालिका अध्यक्ष राजकुमार यादवले पालिकामा अनियमितता गरेको दाबीसहित छानबिनका लागि स्थानीयले अख्तियार दुरुपयोग अनुसन्धान आयोगमा निवेदन दिएका छन् । अध्यक्ष यादवसँग गाडी नभए पनि इन्धन खर्चको नाममा भाडाबापत लाखौँ लिएको, विकास बजेटमा उपभोक्ता समिति र ठेकेदारसँग मिलेर भ्रष्टाचार गरेको दाबीसहित स्थानीयले अख्तियारमा छानबिनका लागि निवेदन दिएका हुन् ।

कार्यालयमा कार्यरत कर्मचारी तथा प्रमुख प्रशासकीय अधिकृतसँग मिलेर विभिन्न शीर्षकमा अध्यक्ष यादवले लाखौँ अनियमितता गरेको प्रतिवेदन सार्वजनिक भएपछि स्थानीयले अख्तियारमा निवेदन दिएका हुन् । २०७४/७५ र २०७६/७७ को महालेखा परीक्षकको कार्यालयबाट सार्वजनिक प्रतिवेदनअनुसार जनप्रतिनिधि र कर्मचाररूको मिलोमतोमा सामान्य फोटोकपी गर्नेदेखि लिएर कुचो खरिद गर्दासमेत व्यापक अनियमितता भएको देखिएको छ ।

७ हजार पर्ने साइकललाई १० हजार रुपैयाँमा खरिद गरेको, पालिकाबासीले २०७४/७५ को बजेट कुन शीर्षकमा कति खर्च भयो भन्ने विषयमा सूचना माग्दा उल्टै धम्क्याउने गरेको, पैसा भुक्तानी गर्दा नियम कानुनलाई अवज्ञा गरेकोजस्ता आरोपसहित स्थानीयले अख्तियारमा निष्पक्ष छानबिनको माग गरेका छन् ।

२७ असारमा बर्दिबास र ३ साउनमा काठमाडाैंस्थित अख्तियारको कार्यालयमा सोनमाका जनप्रतिनिधिविरुद्ध छुट्टाछुट्टै निवेदन प्राप्त भएको कार्यालयले जनाएको छ । निवेदनमा जनताको करले तिरेको पैसालाई आफ्नै ठानी व्यापक अनियमितता गर्नु अपराध भएको उल्लेख गर्दै दोषीलाई अविलम्ब छानबिन गरी कानुनी दायरामा ल्याउन माग गरिएको छ ।

पालिका खबरमा प्रकाशित समाचार सेयर गर्ने स्थानीयलाई समेत धम्की

पालिका खबरमा प्रकाशित समाचार सेयर गरेको विषयलाई लिएरसमेत गाउँपालिकाका जनप्रतिनिधिले स्थानीयलाई धम्क्याउने र हातपात गर्ने गरेको खुलासा भएको छ । गत बिहीबार गाउँपालिकाका स्थानीय युवा अनिल यादवलाई पालिकाको कार्यालयमै बोलाएर जनप्रतिनिधिको निर्देशनमा हातपात भएको एक युवाले पालिका खबरसँग गुनासो गरे ।

फोन गरेर पालिकामा बोलाइएको र समाचार सेयर र स्टाटस गरेको विषयलाई लिएर आफूमाथि हातपात भएको पीडित अनिल यादवको भनाइ छ । स्टाटस र समाचार किन सेयर गरेको भन्दै जनप्रतिनिधिकै अगाडि केही युवाले हातपात गर्दा पनि उनीहरू मुकदर्शक बनेको यादवले बताए ।

यस्ताे थियाे समाचार

 

सोनमा गाउँपालिकामा अनियमितताको चाङ

पालिकाका अध्यक्ष यादव भन्छन्: लेखापालले जिम्मा लिनुपर्छ 

यसो भन्छन् अध्यक्ष यादव

सोनमा गाउँपालिकाको विकास देख्न नचाहने केही व्यक्ति राम्रा कामलाई विफल बनाउन लागिपरेका छन् । जनतालाई असर पार्ने खाले कुनै काम गरेको छैन । निराधार आरोपलाई प्रमाणित गरेर देखाउन चुनौती दिन्छु ।

राजनीतिक स्वार्थका लागि केही व्यक्ति परिचालन भएको बताउँदै अध्यक्ष यादवले भने, ‘बहुसंख्यक जनता मेरै साथमा छन् । केही विकासविरोधीले मलाई विफल बनाउन लागिपरेका हुन् ।’

आलोचनाभन्दा कामलाई केन्द्रबिन्दुमा राख्ने भएकाले कसले के भन्छ भन्ने विषयमा ध्यान दिन नसकेको अध्यक्ष यादवको भनाइ छ ।