रूपन्देही– बिहीबार रातीदेखि परेको निरन्तरको वर्षापछि आएको बाढीका कारण रूपन्देहीको देवदहस्थित घोडाहा खोला पुल भासिएको छ ।

पुल भासिएपछि पूर्व–पश्चिम राजमार्गमा यातायात अवरुद्ध भएको छ । ट्राफिक प्रहरीका अनुसार नवलपरासी पश्चिमको बर्दघाट नगरपालिका वडा नम्बर १० लन्डनब्रिजस्थित पूर्व–पश्चिम राजमार्गको सडक खण्ड बासा, भुताहा र सुनवल नगरपालिका वडा नम्बर १२ बडेरास्थित रहेको ड्राइभर्सन पनि बाढीले बगाएको छ ।

लगातारको वर्षाका कारण तिनाउ, कपिलवस्तु वाणगंगा नदी आसपास क्षेत्रमा जोखिम बढेको छ । लुम्बिनी प्रदेश प्रहरी कार्यालयका अनुसार अविरल वर्षाका कारण रूपन्देहीको तिलोत्तमाको भैरहवा, भलबारी, मणिग्राम, सैनामैनाको ढवाहा क्षेत्र, मर्चवार तथा नवलपरासीको गैडाकोटका साथै परासीबजारलगायत ठाउँ डुबानमा परेका छन् ।

यस्तै, निरन्तरको वर्षाका कारण तिनाउ, दानव, रोहिणी तटीय क्षेत्र पनि डुबानमा परेको छ । मानवीय क्षति भने अहिलेसम्म केही नभएको प्रहरीले बताएको छ ।