close

ठडिँदै ऐतिहासिक सम्पदा काष्ठमण्डप

ठडिँदै ऐतिहासिक सम्पदा काष्ठमण्डप

Trulli
ADVERTISEMENT

काठमाडौं– ०७२ को भूकम्पले क्षतविक्षत बनाएको ऐतिहासिक सम्पदा काष्ठमण्डप पुनर्निर्माणको काम ९९ प्रतिशत सम्पन्न भएको छ ।  ०७२ भूकम्पका कारण पूर्ण रूपमा क्षति भएको सम्पदा ६ वर्षपछि पुनर्निर्माण पूरा हुन लागेको हो । १६ वैशाख ०७५ देखि काष्ठमण्डप पुनर्निर्माण समितिमार्फत निर्माण सुरु गरिएको थियो ।


समितिले शुक्रबार कार्यप्रगतिबारे जानकारी दिने उद्देश्यले आयोजना गरेको पत्रकार सम्मेलनमा समितिका अध्यक्ष राजेश शाक्यले सम्पूर्ण काम सकिएको र काष्ठमण्डपको बाहिरी घेरामा काठको बार लगाउने काम भइरहेकाले उक्त काम सकेपछि राष्ट्र प्रमुखबाट उद्घाटनको मिति तय गरिने जानकारी दिए । ‘काष्ठमण्डप पुनर्निर्माणको काम लगभग सकियो, केही सानातिना काम मात्र बाँकी छन् । यही महिनाको अन्तिमसम्म उद्घाटन गर्छौं,’ शाक्यले भने ।


उक्त सम्पदा काठमाडौं महानगरको ११ करोड ५० लाख रुपैयाँ आर्थिक सहयोगमा स्थानीय उपभोक्ता समितिबाट निर्माण भएको हो । काष्ठमण्डप पुनर्निर्माणमा तराईका विभिन्न ६ जिल्लाबाट ल्याइएका सालको काठ प्रयोग गरिएको बताइएको छ । शाक्यका अनुसार काष्ठमण्डप पुनर्निर्माणमा बारा, पर्सा, महोत्तरी, रौतहट, कञ्चनपुर र चितवनबाट ल्याइएको सालको काठ प्रयोग गरिएको छ ।

 

अन्य काठको तुलनामा सालको काठको आयु धेरै (टिकाउ) हुने भएकाले काष्ठमण्डप पुनर्निर्माणमा सालको काठ नै प्रयोग गरिएको शाक्यको भनाइ छ । काष्ठमण्डपको मूल थाममा प्रयोग भएको काठ महोत्तरीबाट ल्याइएको हो । काष्ठमण्डपका मूल चार वटा थाममध्ये एउटा थाम पुरानै र तीन नयाँ थाम प्रयोग गरिएको छ ।

 

पुरानो थाम हजार वर्ष पुरानो हो भने नयाँ थाम महोत्तरीबाट ल्याइएको अग्राखको हो । पुनर्निर्माणका क्रममा धेरै नयाँ काठ प्रयोग भए पनि केही पुराना काठ प्रयोग भएको पत्रकार सम्मेलनमा जानकारी दिइयो ।


पुनर्निर्माणका क्रममा काष्ठमण्डपमा काठबाहेक ढुंगा, माटो, इँटालगायतका सामग्री प्रयोग गरिएको छ । पुनर्निर्माणका लागि धरहरा र ताहाचलको माटो प्रयोग गरिएको छ ।

 

विगतमा काष्ठमण्डपमा प्रयोग गरिएको माटो परीक्षण गर्दा मिल्ने खालको माटो ताहाचल र केही धरहरासँग मिलेको हुनाले यी दुवै ठाउँको माटो प्रयोग गरिएको हो । त्यसैगरी ढुंगा, तेलिया इँटा र झिँगटी इँटा भक्तपुरबाट ल्याइएको थियो । तेलिया इँटा भुइँमा र झिँगटी इँटा छानामा प्रयोग गरिएको छ ।