फागुन ११, २०८०
इलाम - सन्दकपुर गाउँपालिकाले दूधमा प्रतिलिटर एक रुपैयाँ प्रोत्साहन दिने भएको छ । गाउँपालिकाले पशु पालक कृषकको सहयोग तथा पशु पालनमा आकर्षण बढाउनका लागि प्रोत्साहन रकम वितरण गर्न लागेको हो ।
गाउँपालिकाले आगामी केही दिनबाटै सो रकम वितरण गर्न थाल्ने पालिकाका पशु सेवाका प्रमुख सविन भट्टराईले बताए । उनका अनुसार गाउँपालिकाले चालु आर्थिक वर्षबाट पहिलो पटक प्रोत्साहन रकम वितरण गर्न लागेको हो ।
गाउँपालिकाले चालु आवमा १० लाख ३ हजार दूधमा प्रोत्साहन रकम वितरण गर्ने उनको भनाइ छ । सोका लागि गाउँपालिकाले चालु आवमा एक रुपैयाँको दरले १० लाख तीन हजार रुपैयाँ बजेट विनियोजन गरेको उनले सुनाए ।
उनका अनुसार गाउँपालिकामा हाल दैनिक रुपमा १५ देखि २० हजार रुपैयाँसम्म दूध उत्पादन हुँदै आएको छ । उत्पादित दूध स्थानीय सहकारी संस्था, डेरी तथा संकलक केन्द्रले संकलन गर्दै आएको उनले सुनाए । सोही सहकारी तथा डेरीमार्फत गाउँपालिकाको उपस्थितीमा प्रोत्साहन रकम वितरण गर्ने उनले सुनाए ।
उत्पादित दूध डिडिसीलाई बिक्री गर्नुका साथै घ्यू र छुर्पी बनाउँदै आएको छ । तर पछिल्लो समय छुर्पीको मूल्यमा गिरावट भएकाले स्थानीय बासिन्दालाई समस्या हुने गरेको उनले सुनाए ।
'छुर्पिको मूल्य राम्रो हुँदा दुई वटा गाई पालेर पनि सन्तानलाई बोर्डिङ स्कूलमा पढाएर जिविकोपार्जन गर्न सक्ने स्थानीय बासिन्दा हुनुहुन्थ्यो,' उनले भने, 'तर अहिले मूल्य कम भएकोले केही समस्या हुने गरेको छ ।'गाउँपालिकामा हाल करिब तीन हजार परिवारलाई पशु पालन गर्दै आएको उनको भनाइ छ ।
गाउँपालिकाले दूध तथा कृषिजन्य सामग्रीको बजारीकरणको लागि कृषि एम्बुलेन्स सञ्चालनमा ल्याउन लागेको उनले सुनाए । सहकारीमार्फत सञ्चालन गर्ने योजना रहेको गाउँपालिकामा इच्छुक सहकारीको लागि सूचनासमेत जारी गरिसकेको उनको भनाइ छ ।
पशुपालक कृषकलाई लक्षित गरी गाउँपालिकाले कृत्रिम गर्भाधानलगायत विभिन्न कार्यक्रम सञ्चालन गर्दै आएको उनले सुनाए ।
फागुन २९, २०८०
फागुन २५, २०८०
फागुन २४, २०८०
कात्तिक १४, २०८१
