रूपन्देही– गुल्मीको मालिका गाउँपालिकाले लोकल रक्सीलाई ब्रान्ड बनाउन ऐन पारित गरेको छ । देशभर लोकल रक्सीलाई ब्रान्डको रूपमा विस्तार गर्नुपर्ने बहस चलिरहँदा गुल्मीको मालिकाले लोकल रक्सीलाई ब्रान्ड बनाउने ऐन नै पारित गरेको हो ।

गाउँपालिकाको नवौँ गाउँसभाबाट स्थानीयमदिरा ऐन (कोदो तथा खुर्पानीको रक्सी) उत्पादन, ब्रान्डिङ, बिक्री वितरण तथा व्यवस्थापन ऐन बहुमतले पारित भएको हो । स्थानीय स्तरमै पाइने कोदो र विभिन्न फलफूलको रसबाट उत्पादन हुने मदिरालाई ब्रान्डको रूपमा ऐन बनाएर अगाडि बढाउने मालिका जिल्लामै पहिलो पालिका बनेको छ ।

नेपालको सविधान, २०७२ को अनुसूची ८ ले दिएको अधिकार प्रयोग गर्दै उक्त ऐन जारी गरिएको गाउँपालिकाले जनाएको छ । उत्पादित लोकल मदिराको गाउँपालिकाले गुणस्तर मापन गरी स्टिकर टाँस्ने र सिलबन्दी गर्ने बताइएको छ ।

साथै, लोकल मदिरालाई ब्रान्ड बनाउन विभिन्न नीति नियम बनाइएको गाउँपालिकाले जनाएको छ । गाउँपालिकाले बनाएको नीति तथा नियमभन्दा बाहिर जानेलाई ५० हजार रुपैयाँसम्म जरिमाना गर्न सकिने व्यवस्थासमेत पालिकाले गरेको छ ।