बागमती– बागमती प्रदेश सरकारले आफ्नो क्षेत्रभित्रका सामुदायिक विद्यालयलाई  प्रयोगशाला स्थापनाका लागि अनुदान दिने  भएकोे छ । सो कार्यका लागि मापदण्ड र सर्तहरुसमेत तोकेर  प्रादेशिक  शिक्षा विकास निर्देशनालयले  १२ लाखदेखि १५ लाख रुपैयाँसम्म अनुदान दिने बताइएको छ । 

निर्देशनालयका अनुसार  सामुदायिक  विद्यालयमा  विज्ञान विषय र सूचना  प्रविधि  प्रयोगशाला  स्थापनासम्बन्धी कार्यविधि  २०७८ अनुसार  छनोट भएका विद्यालयलाई रकम उपलब्ध गराइने छ । उक्त कार्यविधिअन्तर्गत सूचना प्रविधिका लागि  १५ लाख तथा विज्ञान  प्रयोगशालाका लागि  १२ लाख अनुदान प्रदान गरिने भएको छ । 

प्रदेश सरकारले आर्थिक वर्ष २०७८/७९ को बजेटमा  उल्लेख भएबमोजिम  निर्देशनालयले कार्यविधि तयार गरी अनुदान दिनेछ । कार्यविधिमा प्रयोगशाला स्थापना गर्ने विद्यालय पहिचान गरी मापदण्ड  निर्धारण गरी अनुदान दिने निर्देशनालयको ठहर छ ।      

विद्यार्थीलाई सिमकार्ड 

मकवानपुरको ७ हजार १३८ विद्यार्थीहरुलाई हेटौँडा उपमहानगरपालिकाले सियुजी सिम वितरण गरेको छ । सङ्घीय सरकारबाट अनुदानस्वरूप  प्राप्त  २६ लाख ७६ हजार छ सयबाट जिल्लाका १० पालिकामा इन्टरनेटको पहुँच  नभएका ठाउँहरुमा सियुजी सेवा उपलब्ध गराइएको उपमहानगरपालिकाले जनाएको हो ।

शिक्षा विकास महाशाखाका अधिकृत सामचन्द्र खड्काका अनुसार  १२५ रुपैयाँका दरले जिल्लाका २३ विद्यालयका  कक्षा ४ देखि १२ कक्षासम्मका विद्यार्थीलाई उक्त सिम वितरण गरिएको थियो ।