मुगु– मुगुमा पछिल्लो समय कोरोना संक्रमण तीव्र गतिमा बढिरहेको छ । आइसोलेसन बेड, अक्सिजन र भेन्टिलेटर नहुँदा संक्रमितह होम आइसोलेनमै दिन कटाउन बाध्य छन् ।
कोरोना संक्रमित दिनप्रतिदिन भेटिँदै गए पनि उपचार गर्न जिल्ला अस्पतालसमेत पूर्वाधार अभाव छ । आइसियु, बेड र अक्सिजन सिलिन्डरको पनि अभाव देखिएको छ ।
मुगुमा हाल संक्रमितको संख्या १ सय नाघिसकेको छ । कोरोना संक्रमण समुदाय स्तरमै फैलिइसकेको अवस्था छ ।
मुगुमा एउटा नगरपालिकासहित ३ वटाँ गाउपालिका छन् । तर, यी गाउँका सिंहदरबारले संक्रमितलगायत अन्य नागरिकलाई कोरोना संक्रमणका बेला राहत दिनुको साटो सिन्कोसमेत नभाँचेको पाइएको छ ।
४ वटा स्थानीय तहमध्ये मुगु कार्मारोङ गाउँपालिका १०, सोरुमा २० , खत्याड गाउँपालिका ५ वटा र छायानाथ रारा नगरपालिका जिल्ला अस्पतालमार्फत १० बेडको आइसोलेसनमा भर परेका छन् । जिल्लाभर कुनै पनि आइसियु सुविधा छैन । भेन्टिलेटर नहुँदा आइसियु सञ्चालन नगरिएको हो ।
तर, आइसियु र भेन्टिलेटरजस्तै सेवा दिने एलजियु (हाइ डिपेन्डेन्ट युनिट) व्यवस्था गर्नुपर्ने अवस्था आएको जिल्ला अस्पताल मुगुका निमित्त स्वास्थ्य सेवा व्यवस्थापक ज्ञानसिंह बुढाले बताए ।
अस्पतालमा हाल २ वटा अक्सिजन सिलिन्डर मात्र छन् । २७ वटा खाली सिलिन्डर भर्न नेपालगञ्ज पठाइएको छ । ‘कोरोनाका संक्रमित बिरामीका लागि सरकारसँग थप सिलिन्डर माग गरे पनि सुनुवाइ भएको छैन,’ बुढाले भने, ‘गम्भीर खाले बिरामी उपचारका लागि गाह्रो छ । थप उपचार गर्न सुविधासम्पन्न अस्पतालमा रेफर गर्नुबाहेक कुनै विकल्प छैन ।’
संक्रमितको संख्या ह्वात्तै बढे पनि ४ वटै स्थानीय तहले रोकथाम तथा नियन्त्रणमा पहल नगरेको नागरिकको गुनासो छ । ‘कोरोना समुदाय स्तरमा फैलिँदै गए पनि यसको नियन्त्रण, उपचार र परीक्षणका लागि स्थानीय सरकारहरूले पहल नगर्दा भयावह अवस्था आउन सक्ने स्थिति छ’, जिल्ला प्रहरी कार्यालय मुगुका प्रहरी नायब उपरीक्षक चित्रबहादुर भट्टराई भन्छन् ।
कार्मारोङ डाक्टरविहीन
मुगुको मुगुम कार्मारोङ गाउँपालिकाले चिकित्सक अभाव भोग्दै आएको छ । गत वर्ष १ कात्तिकदेखि १ माघसम्म १० बेडको अस्थायी कोभिड अस्पतालक लागि २ जना स्टाफ नर्स र १ जना कार्यालय सहयोगीको भरमा कोभिड अस्पताल सञ्चालन गरिएको थियो ।
तर, आर्थिक अवस्था कमजोर भएपछि उक्त अस्पताल हाल बन्द रहेको गाउँपालिकाका प्रमुख प्रशासकीय अधिकृत तीर्थबहादुर कठायतले बताए ।
उनले भने, ‘अहिले दोस्रो लहरको कोरोना भेरियन्ट तीव्र गतिमा फैलिएपछि रोकथाम तथा नियन्त्रण गर्न र कोभिड संक्रमितलाई उपचार गराउन अस्पताललाई पुनः सञ्चालनमा ल्याउने तयारी छ ।
त्यसका लागि १७ वैशाखमा बसेको गाउँकार्यपालिका बैठकले प्रदेश सामाजिक विकास मन्त्रालय सुर्खेत र केन्द्र सरकारलाई आवश्यक बजेट तथा जनशक्ति पठाउन माग गरिएको छ । तर, हालसम्म कुनै सुनुवाइ नभएको कठायत सुनाउँछन् ।