उदयपुर–    जीर्ण भवनबाट सेवा दिँदै आएको उदयपुर जिल्ला अदालतले अत्याधुनिक सुविधासम्पन्न भवन पाउने भएको छ । भवन अभाव झेलिरहेको उदयपुर जिल्ला अदालतका लागि अहिले सुविधासम्पन्न संरचना निर्माण भइरहेको हो ।

साढे तीन तले भवनमा जिल्लामै पहिलो पटक दुई लिफ्ट व्यवस्था गरिएको छ । एउटा लिफ्ट कर्मचारी र अर्को लिफ्ट सेवाग्राहीलाई सहज हुने गरी निर्माण गरिँदै छ ।

नयाँ भवन पीडितमैत्री, बालमैत्री, अपांगतामैत्री, थुनुवा विश्राम कक्ष र सेवाग्राहीलाई सहज हुने गरी स्टिमेट बनाइएको अदालतका स्रेस्तेदार धनबहादुर कार्कीले बताए ।

अपांगतामैत्री भवन नहुँदा यस्ता सेवाग्राहीलाई सेवा प्रवाहमा असहज हुने गरेको थियो । एउटै इजलासबाट सेवा प्रवाह गर्दै आएको अदालतले नयाँ भवनमा बालबालिकालाई लक्षित गरी एक बाल इजलाससहित चार वटा इजलास रहने गरी भवन निर्माण भइरहेको छ ।

सुरक्षाको दृष्टिले समेत भवनका सबै ठाउँमा सिसीक्यामेरा जडान गरिने स्रेस्तेदार कार्कीले बताए । अदालतको स्वामित्वमा रहेको १२ कठ्ठा ८ धुर क्षेत्रफलमा भवनको पछाडि भागमा सुरक्षा ब्यारेक, अगाडि सुविधायुक्त चमेनागृह, माथिल्लो तलामा सभाहल, खानेपानी, आधुनिक शौचालयलगायत संरचना रहनेछन् ।

कार्यकक्ष अभावका बीच नेपाल बार एसोसिएसनको भवनबाट कार्य सम्पादन गर्दै आएको जिल्ला अदालतमा पहिलो सुविधासम्पन्न भवन निर्माण हुन लागेको हो ।
भवन निर्माणको लागत १३ करोड ४२ लाख ८१ हजार ९ सय २६ रुपैयाँ ९५ पैसा रहेको छ । 

३ वर्षभित्र ३० जेठ २०८० मा निर्माण सम्पन्न गर्ने गरी ९ असार २०७७ सम्झौता भएको भवनको निर्माण जिम्मा सिएम÷कृष्ण लक्ष्मी जेभी काठमाडौंले लिएको छ । निर्माण कम्पनीले सम्झौता गरेको मितिभन्दा ४ महिनापछि निर्माण थालिएको हो ।

निर्माण कम्पनीले काम थालेको ११ महिनामा करिब ५० प्रतिशत निर्माण सम्पन्न गरेको छ । सहरी विकास तथा भवन कार्यालय विराटनगर मोरङको प्राविधिक सहयोगमा निर्माण भइरहेको भवनको ३५ प्रतिशत भौतिक प्रगति र ३०.२९ प्रतिशत वित्तीय प्रगति भएको उदयपुर जिल्ला अदालतका लेखापाल विष्णु खड्काले बताए ।

२०४६ मा निर्माण भएको पुरानो भवन २०४५ र २०७२ को भूकम्पले जीर्ण बनाएको थियो । पहिला एउटा मात्र न्यायाधीश र इजलास रहेकामा अहिले मुद्दाको चाप बढेकाले तीन न्यायाधीशको दरबन्दी र तीन वटै इजलास रहेका छन् ।

भूकम्पले जीर्ण बनाएको भवनमा पानी चुहिने हुँदा कार्य सम्पादन र कर्मचारी व्यवस्थापनमै समस्या भइरहेका नयाँ भवन बनेपछि सहज हुने लेखापाल खड्काले बताए । 

नयाँ भवन निर्माणसँगै सेवाग्राही र कानुन व्यवसायीलाई समेत सेवा प्रवाह सहज हुने नेपाल बार एसोएियसन उदयपुर इकाइका अध्यक्ष श्यामानन्द चौधरीको भनाइ छ । 

निर्माण कम्पनीका सुपरभाइजर राकेश श्रेष्ठले साढे तीन तले भवनको ढलान गर्ने काम सकिएकोे र भित्री काम, सुरक्षा आवासको छत ढलान, चमेनागृह र पुरानो भवन भत्काउने कामबाँकी रहेको जानकारी दिए ।