डिल्लीराज भुसाल, नगरप्रमुख
रेसुंगा नगरपालिका, गुल्मी

गुल्मीको रेसुंगा नगरपालिका प्रमुख डिल्लीराज भुसाल नगरको पूर्वाधार, शिक्षा, स्वास्थ्यलगायत पूर्वाधार निर्माण कोरोना महामारीका कारण अवरुद्ध भएको बताउँछन् । कार्यकालको अन्तिम वर्ष आइपुग्दा नगरपालिकाको विकास निर्माण, कृषि, शिक्षालगायत विषयमा भुसालसँग गरिएको कुराकानी :

---

 

कार्यकालको अन्तिम वर्षमा हुनुहुन्छ । निर्वाचनका बेला गरिएका प्रतिबद्धता कति पूरा गर्न सक्नुभो ? 

 

निर्वाचनका बेला जति बोलेको थिएँँ, त्यो पूरा गर्ने योजना थियो । तर, कोरोना महामारीले भनेजतिको काम गर्न सकेनौँ । झन्डै २ वर्ष महामारी नियन्त्रणमै जुट्यौँ । पूर्वाधार क्षेत्रमा हामीले अघि बढाएका काम पनि त्यही कारणले समयमै सम्पन्न हुन सकेनन् । महामारी सकिँदै जाने अवस्था आएकाले धेरै काम गर्न सक्छौँ भन्ने आस छ । 

 

रेसुंगाले देशका अन्य पालिकाले भन्दा फरक ढंगले नवीनतम कुनै योजना सञ्चालन गरेको छ ? 

हाम्रोमा फरक छ । हामीले अस्पताल सुरु गरेका छौँ । यहाँको विमानस्थल जाने सडक र विमानस्थल स्तरोन्नति भएको छ । कृषकको घरघरमा गएर उत्पादन किन्ने घोषणा गरेका छौँ । पशुपालन, तरकारी उत्पादन गर्न हामीले प्रोत्साहन गरेका छौँ । पाल्पा, बुटवलसम्म पु¥याएर हामीले कृषकलाई बजार खोज्न नपर्ने गरी काम गरेका छौँ । कृषि सामग्री सहयोग पनि गरेका छौँ । 

 

तपाईंले रेसुंगाको विकास निर्माणमा कस्तो खाले मोडल अपनाउनुभएको छ ? 

नगरको विकासका थुप्रै काम भएका छन्, हरेक क्षेत्रमा । कृषकमा मात्रै होइन, खानेपानी, सडक, यातायात क्षेत्रमा हामीले धेरै काम गरेका छौँ । सडकको ट्रयाक खोल्ने गरी काम गरेका छौँ । ७ सय बढी खरका छाना हटाएका छौँ । रोजगारी सिर्जना गर्ने काम गरेका छौँ । उनीहरूलाई उत्पादनमा लगाउने गरी काम गरेका छौँ । 

 

रेसुंगाले पर्यटन पूर्वाधारमा काम गरेको छ कि छैन ? 

 

कार्यपालिकामा आएको बजेट सबै वडामा बजेट बाँडफाँट गर्ने गरेका र्छौँ । संघीय र प्रदेश सरकारबाट आएको बजेटलाई टेन्डर लगाएर काम गर्छौं । सबैको सहमतिमै खर्च गर्छौं । 

 

अघिल्लो आर्थिक वर्षमा देशैभरका स्थानीय तहमा ५ देखि १५ बेडसम्मको अस्पताल बनाउन संघीय सरकारले बजेट दिएको थियो । तपाईंको पालिकामा अस्पताल बनाउने काम कति सम्पन्न भयो ? 

 

गाउँमा आधारभूत स्वास्थ्य चौकी बनाएका छौँ । त्यसबाहेक सबै वडामा ५ शय्याको अस्पताल बनेका छन् । 

 

पालिकाले पूर्वाधार बनाउन खोज्दा जग्गा प्राप्त गर्न निकै झन्झट छ । तपाईंले यस्तो झन्झट बेहोर्नुभएन ? 

जग्गा प्राप्तिको समस्या हामीकहाँ पनि उस्तै छ । सरकारको पैसा लगानी लगाउन मिल्दैन । व्यक्तिसँग जग्गा लिएर हामीले स्वास्थ्य चौकी बनाएका छौँ । 

 

अन्त्यमा, पालिकाले आफ्नो आन्तरिक स्रोत वृद्धिका लागि के प्रयास गरिरहेको छ ? 

 

हामी पहाडको नगर भएकाले यस क्षेत्रमा कलकारखाना छैनन् । कृषिमा कर लिन मिल्दैन । ८० देखि ९० प्रतिशत कर उठेको छ । १ करोड ४० लाख रुपैयाँ आन्तरिक स्रोतबाट कर उठेको छ ।