ताराबहादुर काफ्ले 
अध्यक्ष, कानेपोखरी गाउँपालिका, मोरङ

मोरङको कानेपोखरी गाउँपालिका अध्यक्ष ताराबहादुर काफ्ले चार वर्षे अवधिमा पालिकामा थुप्रै काम भएको बताउँछन् ।  अध्यक्ष काफ्लेसँग पालिकाले गरेका विकास निर्माण, जनप्रतिनिधिका रूपमा काम गर्दाको अनुभव र यो वर्षको प्राथमिकताबारे गरिएको कुराकानी :

तपाईं निर्वाचित भएर आएको ४ वर्षे अवधिमा गाउँपालिकाले विकास निर्माणमा गरेका काम के–के हुन् ? 

निर्वाचित भएर आइसकेपछि यहाँको विकास निर्माण, सामाजिक सेवा सुविधासँग गाँसिएका विषय धेरै छन् । त्यसको लामो फेहरिस्त छ । संक्षेपमा भन्दा हामीले पूर्वाधार क्षेत्रमा धेरै काम गरेका छौँ– त्यो पनि सडकमा  । हामी आउँदा यहाँ ६ किलोमिटर कालोपत्रे सडक थियो । यो वर्षसम्म ४० किलोमिटर सडक कालोपत्रे गरिएको छ । दोस्रो ग्राभेल र सडकको ट्रयाक ा १ सय ५० बढी किलोमिटर खोलिएको छ । ३ वटा वडाबाहेक अन्यत्र वडा कार्यालय थिएनन् । अहिले एउटाबाहेक सबैमा वडा कार्यालय भवन बनेका छन् । ४ वटामा आधारभूत स्वास्थ्य केन्द्र र ३ वटामा स्वास्थ्य चौकी निर्माण गरेका छौँ । १५ शय्याको कानेपोखरी अस्पतालबाट सेवा सुरु गरेका छौँ । यसैगरी कृषि क्षेत्रमा वर्षको २ करोड २७ लाखदेखि २ करोड ५६ लाख रुपैयाँसम्म खर्च गर्छौं । सिँचाइ, कृषि, पशुपक्षीका क्षेत्रमा पनि  धेरै काम गरेका छौँ । 

निर्वाचनमा तपाईंले गरेका प्रतिबद्धता कति पूरा भए ? 

हामीले मध्यावधिक मूल्यांकन ग र्‍यौँ । त्यसमा ९५ प्रतिशत काम गरेका छौँ । भूमिहीनलाई भूमि दिने व्यवस्था गर्न सकेनौँ । अहिले फेरि नयाँ भूमि आयोग बनेको छ । तर, द्रुत गतिले काम गर्दा पनि त्यो पूरा हुन सक्ने देखिँदैन । हाम्रो सीमाका खोलामा तटबन्ध गर्न लागेका छौँ । त्यसमा सरकारले पूरा गर्न सहयोग गरोस् । 

सामाजिक सुरक्षा क्षेत्रमा गाउँपालिकाको विशेष केही कार्यक्रम छन् कि ? 

यो क्षेत्रमा धेरै कार्यक्रम राखेका छौँ । पहिलो औषधोपचार कोष खडा गरेर प्रत्येक बिरामीलाई ५ देखि २५ हजार रुपैयाँसम्म सहयोग गर्ने गरेका छौँ । निःशुल्क स्वास्थ्य बिमा गरिदिने गरेका छौँ । बालबालिकालाई निःशुल्क खाजा वितरण गरेका छौँ । 

जनप्रतिनिधिका रूपमा काम गर्दाको अनुभव सुनाउनुस् न ? 

संघीयताको अभ्यासमा छौँ । यो क्रममा मुलुकमा पहिलो पटक संघीयताको अभ्यास गर्न तीन÷चार विषयमा असहज भयो । कर्मचारी अभाव भयो । मुलुककै सुगम गाउँपालिका हो । सुगम हाम्रै  गाउँमा त कर्मचारी अभाव छ भने अन्य गाउँपालिका, हिमाली भेगमा कति समस्या होला ?  

संघ र प्रदेशले के–के विषयमा समन्वय गर्दा स्थानीय तहलाई काम गर्न सहज हुने देख्नुहुन्छ ? 

हामीलाई दुई वटा विषयमा समन्वय गर्नुपर्छजस्तो लाग्छ । एउटा, कर्मचारी अभाव हुन दिनुहुँदैन । दरबन्दी सिर्जना भएका ठाउँमा सरकारले कर्मचारी पठाउनुपर्‍यो । काम  गर्न सक्नुपर्‍यो  । 

अन्त्यमा, कार्यकालको अन्तिम वर्षमा तपाईंका प्राथमिकता के–के छन् ?  

अहिले पनि हाम्रो प्राथमिकता भनेको स्वास्थ्य, कोभिड अस्पतालको रूपमा अस्पताल निर्माण, स्वास्थ्य चौकी निर्माण र मेडिकल अफिसर राखेका छौँ । अस्पताललाई सामग्री दिने काम गरेका छौँ । शिक्षा क्षेत्रमा ६ वटा निजी दरबन्दी सिर्जना गरेर शिक्षक अभाव भएको ठाउँमा शिक्षक पठाएका छौँ । भौतिक पूर्वाधार क्षेत्रमा अत्यधिक लगानी गरेका छौँ । कृषि र पशुपक्षीका क्षेत्रमा साढे २ करोड रुपैयाँ हाराहारी लगानी गरेका छौँ ।