धीरज शर्मा बस्याल
नगरप्रमुख, बर्दघाट नगरपालिका, नवलपरासी (बर्दघाट सुस्ता पश्चिम) 

नगर प्रमुखका रूपमा नगरवासीको सेवा गर्नु मेरो एक मात्र उद्देश्य हो । निर्वाचित भएयता जनताका अपेक्षाअनुसार नै काम गरिरहेको छु । भौतिक पूर्वाधार, शिक्षा, औद्योगिक ग्राम, विकास निर्माणलगायत नगरपालिकाले गरेको प्रयासमा जनताको साथ छ । विकास निर्माणमा धेरै काम अघि बढेका छन् । 

नगरवासीलाई वडा कार्यालयबाट सर्वसुलभ सेवा दिन हामीले सबै वडाको आफ्नै भवन निर्माण गरेका छौँ । सुशासनको अनुभूति हुने गरी वडा कार्यालयबाट काम भइरहेका छन् । सुशासनलाई प्राथमिकतामा राखेर काम गरिरहेका छौँ । नगरपालिकाबाट सेवा लिँदा कर्मचारीबाट दुःख दिने वा अतिरिक्त लाभ लिने कार्यलाई ‘जिरो टोलरेन्स’ गरेका छौँ । नगरवासीले जुनसुकै बेला जनप्रतिनिधिलाई भेटघाट गर्न सक्ने अवस्था छ । 

चार वर्षको अवधिमा एक सय किलोमिटर सडक कालोपत्रे गर्ने काम सम्पन्न भएको छ । सडकको स्तरीकरण, वैकल्पिक मार्ग खोल्नेलगायत विकास निर्माणमा देखिने काम भएका छन् । दाउन्नेको पहाडमा खस्ने पहिरो र सवारीसाधन दुर्घटना हुँदा यातायात अवरोधका कारण जनताले भोग्नुपरेको सास्तीलाई कम गर्न लुम्बिनी र गण्डकी प्रदेश जोड्ने वैकल्पिक मार्गको ट्र्याक खोल्ने काम गरेका छौँ । 

बर्दघाटको हरेक वडामा स्वास्थ्यचौकी स्थापना गरिएका छन् । सिँचाइका लागि कुलो व्यवस्थित गर्ने, डिप र स्यालो ट्युबबेल निर्माण गरिरहेका छौँ । नगरपालिकाले चार वटा बजेट खर्च गर्दा जनताले चाहेका र अनुभूत गर्ने खालका विकास निर्माणका दर्जनौँ योजना सम्पन्न भएका छन् । अझै एउटा आर्थिक वर्षको बजेट बाँकी भएकाले नगरपालिकाले विकासका आधारहरू तयार गर्ने खालका योजनामा लगानी गर्ने तयारी गरेको छ । 

उत्पादनसँग नजोडिएसम्म जनताको जीवनस्तर नउकासिने र आर्थिक समृद्धि पनि हासिल नहुने भएकाले हामीले कृषकका लागि राहतका आकर्षक प्याकेज लागू गरेका छौँ । नगरपालिकाले कृषक र कृषि क्षेत्रका लागि लागू गरेका योजनाबाट कृषक साथीहरू खुशी भएका छन् । कृषकलाई परम्परागत खेती प्रणालीबाट आधुनिक र व्यावसायिक खेतीमा रूपान्तरण गर्न नगरपालिकाले विशेष पहल लिइरहेको छ ।

बेमौसमी खेतीप्रति कृषकलाई आकर्षित गर्ने विभिन्न कार्यक्रम सञ्चालन गरिरहेका छौँ । कृषि उपज भण्डारण गर्न शीत भण्डार निर्माण, कृषकले उत्पादन संकलन तथा बिक्रीका लागि कृषि बजार निर्माण गरेका छौँ । कृषकको आत्मबल बढाउन र उनीहरूलाई आइपर्ने अप्ठ्यारालाई सहजीकरण गर्न नगरपालिकाले निरन्तर काम गरिरहेको छ । मुख्य खाद्यान्न बालीको बीउमा ५० प्रतिशत र लहरे बालीमा शतप्रतिशत अनुदान दिने व्यवस्था मिलाएका छौँ । नगरपालिकाले कृषि क्षेत्रका लागि लिएका नीतिकै कारण कृषि पेशाबाट बाहिरिने क्रम रोकिएको छ । कृषि गर्न खोज्नेहरू बढेका छन् । नगरपालिकाको १२ र १३ वडालाई मकैको पकेट क्षेत्र र १४ र १५ वडालाई तरकारीको पकेट क्षेत्र बनाएका छौँ । 

नगरपालिकाको नीतिकै कारण सामुदायिक विद्यालयमा विद्यार्थीको संख्या बढ्न थालेको छ । पूर्वप्राथमिक तहका विद्यार्थीलाई खाजा खाने व्यवस्था मिलाएपछि विद्यालय जाने विद्यार्थीको संख्या बढेको छ । हामीले लागू गरेको कार्यक्रमलाई संघीय सरकारले पनि अवलम्बन गरेको छ । संघीय सरकारले पनि कक्षा पाँचसम्म अध्ययन गर्ने विद्यार्थीका लागि खाजा उपलब्ध गराउने कार्यक्रम लागू गरेको छ ।

हामीले नेपालमै पहिलो पटक माध्यमिक तहमा पढ्ने विद्यार्थीका लागि म्याथ ल्याब स्थापना गरेका छौँ । गणित पढ्न गाह्रो हुने र धेरै विद्यार्थी एसईईमा फेल हुने गरेकाले सिकाइलाई सहज बनाउन म्याथ ल्याब स्थापना गरेका हौँ । यसले विद्यार्थीलाई म्याथको सिकाइ सहज बनाइरहेको छ । 

दश तले भ्यू टावर निर्माण, खेल मैदानको स्तरीकरण गर्ने, खुला व्यायामशाला बनाउने नगरपालिकाको योजना छ । यसै गरी बर्दघाटलाई संस्थागत सुत्केरी गराउने नगरपालिका घोषणा गर्ने अन्तिम तयारी गरिरहेका छौँ । जनतासँग जोडिने र जनताले पछिसम्म सम्झिने विकासका आधार तयार गर्नमा जोड दिइरहेका छौँ । जनतासँग जोडिने काम गरिरहेका छौँ ।