काठमाडौं- योद्धा हुन सजिलो छैन । कार्यक्षेत्रमा नै हो योद्धाले आफ्नो प्राण त्याग्ने । कोरोना भाइरसको यो दुर्बाेध्य परिस्थतिमा पनि आफ्नो प्राणको पर्वाह नगरी कोरोनासँग लड्दालड्दै धेरैले मृत्युवरण गरिसकेका छन् । सिंगो देश महामारीले निम्त्याएको शोकमा छ ।

महामारीलाई नै अंकमाल गरिरहेका स्थानीय सरकारका जनप्रतिनिधि पनि यो कोरोनाविरुद्धको युद्धमा शहीद भएका छन् । दोस्रो लहरमा मात्रै कोरोनाका कारण २० जनप्रतिनिधिको मृत्यु भइसकेको छ । मृत्यु भएपछि अहिले जनप्रतिनिधिको उपस्थितिमा हुनुपर्ने केही काम रोकिएका छन् भने कतै शोकलाई शक्तिमा बदल्दै पालिकाहरू अझ मजबुत भएर स्थानीयको सुख र दुःखको सारथि बनिरहेका छन् ।

अहिले पनि देशभर कोरोना भाइरसको संक्रमण फैलिएको छ । पछिल्लो समय स्वास्थ्य तथा जनसंख्या मन्त्रालयले पीसीआर परीक्षणको दायरा घटाउँदा संक्रमण केही घटेको छ । त्यति मात्र नभई संक्रमण एउटा निश्चित बिन्दुमा पुगेपछि घट्ने स्वाभाविक भएकाले अहिले संक्रमणको दर घटेको छ । तर, जिल्लामा अझै महामारी घटेको छैन । समुदायस्तरमा महामारी फैलिँदा पनि संक्रमणको अवस्था बुझ्न सकिएको छैन ।

स्थानीय परीक्षणको दायरामा आउनै चाहँदैनन् । तर, आफ्ना नागरिकलाई महामारीको चपेटामा पार्नुहुन्न भन्दै रातदिन नभनी स्थानीय सरकार गाउँगाउँ गएर परीक्षण गरिरहेका छन् । कोही त स्थानीयको स्याहारसुसारमा लागेका छन् । तर, महामारीले यस्ता थुप्रै जनप्रतिनिधिलाई हर्‍यो, जो नागरिककै स्याहार गर्दागर्दै संक्रमित हुन पुगे । र, कोरोनाको यो युद्धमा आफूलाई हार्न पुगे । 

गत वैशाखयता मात्र ७ सय ५३ स्थानीय तहका २० जना जनप्रतिनिधिको कोरोनाको कारण मृत्यु भएको छ । नियन्त्रण र उपचारमा खटिँदा खटिँदै संक्रमित भएर ज्यान गुमाउनेमा नगरपालिकाका जनप्रतिनिधि बढी छन् । हालसम्म नगरपालिकाका १३ जनप्रतिनिधिले ज्यान गुमाउँदा गाउँपालिकाका ७ जनाको पनि ज्यान गएको छ । गाउँपालिका महासंघ र नगरपालिका संघले उपलव्ध गराएको तथ्यांकअनुसार नगरप्रमुखदेखि वडा सदस्यको समेत मृत्यु भएको छ । 

कोरोनाका कारण मृत्यु हुने जनप्रतिनिधिहरू:

कोरोनाका कारण मृत्युवरण गरेका यी जनप्रतिनिधिको स्थान अहिले रिक्त छ । कतै नगरप्रमुखकै मृत्यु भएकाले पनि कामकाज प्रभावित भइरहेको छ । गत वर्ष पनि महामारीमा केही जनप्रतिनिधिको मृत्यु भएको थियो । यो पटक मृत्यु हुनेको संख्यामा पनि वृद्धि भएको छ ।

पहिलो महामारीपछि कोरोनालाई खेलाँची ठान्दा र पूर्वतयारी नगर्दा धेरै जनप्रतिनिधिको मृत्यु भयो । अझै पनि तेस्रो र चौथो लहर आउने सरकारले नै चेतावनी दिइरहँदा थप जनताका सेवक र स्थानीयको मृत्यु हुन नदिन हाल बनाइएका पूर्वाधारलाई निरन्तरता दिन आवश्यक छ ।