उदयपुर– उदयपुरका ग्रामीण क्षेत्रमा बजार अनुगमन नगरिँदा उपभोक्ताले म्याद नाघेका दैनिक उपभोग्य वस्तु प्रयोग गर्न बाध्य भएका छन् । मेलापर्वमा बजार अनुगमन सहर र सदरमुकाम केन्द्रित हुँदा ग्रामीण क्षेत्रका नागरिकले महँगो मूल्य र गुणस्तरहीन सामग्री उपभोग गर्नुपर्ने अवस्था रहेको हो ।

ग्रामीण क्षेत्रमा सडक विस्तारसँगै मानव स्वास्थ्यमा असर गर्ने उपभोग्य वस्तुको बिक्री हुने गरेको छ । सहर र सदरमुकाममा उपभोक्ता सचेत भएकाले व्यापारीले खान अयोग्य चाउचाउ, बिस्कुट, पेय पदार्थ र म्याद गुज्रिएका औषधी बिक्री ग्रामीण क्षेत्रमा गर्न थालेका छन् ।

दसैँअगावै सदरमुकाम गाईघाट, बेल्टार र कटारीमा मात्रै बजार अनुगमन गरिएको थियो । तर, अनुगमन गरिरहेकै बजारमा थोक बिक्रेताले म्याद गुज्रिएका, प्रयोग गर्न नमिल्ने दैनिक उपभोग्य वस्तु ग्रामीण क्षेत्रका बजारमा पठाउने गरेका छन् ।

मुख्य बजारका अधिकृत बिक्रेताले ग्रामीण बजारमा खाद्यान्न, कपडा, पेय पदार्थलगायत वस्तु पठाउने गरेका छन् । अधिकृत बिक्रेताकहाँ आइपुग्दै म्याद सकिने र उपभोग्य मिति कम भएका वस्तु ग्रामीण बजारमा पठाउने गरिएको छ ।

गाउँघरका व्यापारीले महिनौँदेखि दसैँ–तिहारलाई लक्षित गरी अत्यावश्यक वस्तुको जोहो गर्छन् । लामो समयसम्म राख्दा ती वस्तुको म्याद सकिएको हुन्छ । गाउँघरमा अनुगमन गर्ने निकाय नहुँदा उपभोक्ताले मनलाग्दी मूल्य तिर्नुपर्ने र म्याद गुज्रिएका सामग्री उपभोग गर्नुपर्ने अवस्था रहेको स्थानीय बताउँछन् ।

बजार अनुगमन गर्ने जिम्मा स्थानीय प्रशासन र स्थानीय तहलाई दिइएको छ । तर, स्थानीय तहले बजार अनुगमन नगर्दा यस्तो समस्या आएको उपभोक्ताको गुनासो छ । स्थानीय प्रशासनले बजार अनुगमन नगर्दा उपभोक्ता अखाद्य वस्तु प्रयोग गर्न बाध्य भएको रौतामाईका भरत दाहाल बताउँछन् ।