दाङ–दाङको राप्ती गाउँपालिकाले बालबालिकाको अधिकार तथा संरक्षण नीति निर्माणका लागि तेस्रो चरणको मस्यौदा संकलन कार्यशाला गोष्ठी आयोजना गरेको छ । राप्ती गाउँपालिकाको महिला, बालबालिका तथा ज्येष्ठ नागरिक शाखाको आयोजनामा कार्यशाला गोष्ठी आयोजना गरिएको हो । 

राप्ती गाउँपालिका र बेस संस्थाको सहकार्यमा दुई चरणको मस्यौदा निर्माण सम्पन्न भएपछि बालबालिकाको अधिकार तथा संरक्षण नीतिलाई अन्तिम रूप दिन गोष्ठी आयोजना गरिएको हो । राप्ती क्षेत्रका ९ वटै वडाका बाल क्लबका प्रतिनिधि, कार्यपालिका सदस्य साथै शाखा प्रमुखको सहभागिता रहेको गोष्ठीमा नीति निर्माण र कार्यान्वयनका पक्षमा छलफल गरिएको थियो । 

गोष्ठीमा राप्ती गाउँपालिका उपाध्यक्ष एवं न्यायिक समिति संयोजक जगदम्बाकुमारी चौधरी, पालिका अध्यक्ष नुमानन्द सुवेदी सहभागी थिए । उक्त कार्यक्रममा सबै किसिमका शारीरिक वा मानसिक हिंसा, क्षति वा दुव्र्यवहार परित्याग, उपेक्षा, शोषण वा यौन दुव्र्यवहारबाट बालबालिकालाई संरक्षण गर्नेलगायत विषय समावेश गरिएको थियो । 

बालबालिका जन्मनुअघि र जन्मेपछि तिनलाई आवश्यक स्याहार, पोषण सहयोग एवं शिक्षा प्रदान गरी शारीरिक, मानसिक र शैक्षिक विकास गर्ने, बाल सहभागिता अभिवृद्धि गर्ने, बालबालिकाप्रतिको विभेद अन्त्य गर्ने, बाल न्याय प्रणालीलाई सुदृढ गर्ने विषय नीतिमा समावेश गरिएको छ । राप्ती पालिकाको महिला, बालबालिका तथा ज्यउेष्ठ नागरिक शाखाकी महिला विकास निरीक्षक जीवनकुमारी जिसी, सहायक महिला विकास निरीक्षक कल्पना खनाल, बेसका वासुदेव चौधरी र पटवारी यादवले बालबालिकाको अधिकार तथा संरक्षण नीतिबारे सहजीकरण गरेका थिए ।