जुम्ला–जिल्ला प्रहरी कार्यालय बाँकेमा मुगुका सांसद मोहन बानियाविरुद्ध बलात्कार मुद्दा दर्ता भएको छ । जुम्लाकी एक महिलाले सांसद बानियाविरुद्ध बाँके प्रहरी कार्यालयमा २४ माघमा उजुरी दिएकी थिइन् । 

सांसद बानियाको बलात्कार मुद्दा जिल्ला प्रहरी कार्यालय बाँकेको दर्ता नम्बर ३७२ मा दर्ता भएको छ । पीडित महिलाले सांसद बानियाले नेपालगञ्जस्थित अप्सरा होटलमा बोलाएर बलात्कार गरेको जाहेरीमा उल्लेख गरेकी छन् । 

जिल्ला प्रहरी कार्यालय बाँकेले बहालवाला सांसदको हकमा सभामुखबाट अनुमति लिनुपर्ने बताउँदै मुद्दा दर्ता गर्न मानेको थिएन । जिल्ला प्रहरी कार्यालय बाँकेका प्रहरी नायब उपरीक्षक मधुसूदन न्यौपानेले सांसद बानियाविरुद्ध जिल्ला प्रहरी कार्यालय बाँकेमा मुद्दा दर्ता भएको जानकारी दिए । उनले भने, ‘सांसदविरुद्धको मुद्दा दर्ता भइसक्यो । अब अनुसन्धान अघि बढ्छ ।’

जाहेरी दिएको चार दिनपछि मुद्दा दर्ता भएको हो । मुद्दा दर्ता नभएको बारे चौतफी दबाब सिर्जना भएपछि जिप्रका बाँकेले मुद्दा दर्ता गरेको हो । पीडित महिलाले सांसद बानियालाई तत्काल निलम्बन गरेर अनुसन्धान अघि बढाउन माग गरेकी छन् ।

पीडित महिलाले भनिन्, ‘सांसद बानियाविरुद्ध मुद्दा दर्ता भएको खबर प्राप्त भएको छ । डिएसपीले मुद्दा दर्ता भइसक्यो । दर्ता नम्बर लिन आउनुहोस् भनेर फोन गर्नुभएको थियो ।’ १९ माघ बिहान ५ बजे बाँके नेपालगञ्ज उपमहानगर वडा नम्बर २ स्थित अप्सरा होटलको कोठा नम्बर २१५ मा सांसद बानियाले बलात्कार गरेको पीडित महिलाको दाबी छ ।

सांसद बानियाले ८ मंसिर ०७६ मा सामूहिक व्यापार गर्ने भन्दै पीडित महिलाबाट २५ लाख रुपैयाँ लिएका थिए । त्यो रकम फिर्ता गर्न पटक–पटक पीडित महिलासँग छलफल तथा भेटघाट गरेका थिए । सांसद बानिया रुपैयाँ दिन्छु भन्दै १८ माघमा सुर्खेत पुगेका थिए । तर, सुर्खेतमा भेट हुँदा पैसा नभएको भन्दै नेपालगञ्जमा आफन्तले रकम जम्मा गरिसकेकाले सँगै त्यहाँ जान दबाब दिए । 

बानियाले अप्सरा होटलको २१५ नम्बर कोठा बुक गरेका थिए । पीडित महिलाले भनिन्, ‘घर जान्छु, भोलि बिहान रकम ल्याइदिनुस् भनेँ । तर, अबेरसम्म रकम ल्याउने भनेर सांसद बानियाले होटलमै बस्न दबाब दिए । बिहान ५ बजे सांसद बानियाले ढोका ढक्ढकाएर रकम आइसकेकाले लिन आग्रह गर्दै ढोका खोल्न लगाए ।’

ढोका खोल्नेबित्तिकै सांसद बानियाले जबर्जस्ती करण गर्न खोजेको उनले दाबी गरिन् । करणी गर्न नदिए यही कोठामै मारिदिन्छु भनेर धम्की दिएको पीडित महिलाको गुनासो छ । अन्याय सहन नसकेर जिल्ला प्रहरी कार्यालय बाँकेमा उजुरी दिएको उनले बताइन् । पीडित महिलाको स्वास्थ्य जाँच भइसकेको प्रहरीले बताएको छ ।