बाँके–नेपालगञ्ज–गुलरिया रोडअन्तर्गत खजुरा बजारको मनकामना चोकमा अज्ञात समूहले नो एमसिसी लेखेर राखेको प्रेसर कुकर बम नेपाली सेनाले निष्कृय पारेको छ । चोकमा रहेको राष्ट्रिय झन्डामुनि इँटले छोपेर राखिएको प्रेसर कुकरमा रातो अक्षरले ‘नो एमसीसी’ लेखिएको अवस्थामा बम राखिएको स्थानीयले देखेपछि बिहान ७ बजे जानकारीमा आएको जिल्ला प्रहरी कार्यालय बाँकेका प्रवक्तासमेत रहेका प्रहरी नायव उपरिक्षक मधुसूदन न्यौपानेले बताए ।

चोकमा रहेको राष्ट्रिय झन्डामुनि बम राखिएपछि नेपालगञ्ज–गुलरिया सडक खण्ड बिहान सवा ११ बजेसम्म अवरुद्ध भएको थियो । नेपाली सेनाको नम्बर ४ वाहिनी अड्डा, भैरवप्रसाद गण इमाम नगर राँझा ब्यारेकबाट सुवेदार थानेश्वर पोखरेल नेतृत्वको टोलीले बम निष्कृय पारेको थियो ।

सैनिक टोलीले बिहान ११ः४ बजे विस्फोट गराई बम निष्कृय पारेको हो । खजुरा बजारमै बम राखेपछि स्थानीय बिहानैदेखि त्रसित बनेका थिए । बम डिस्पोज गरेसँगै बिहानैदेखि अवरुद्ध नेपालगञ्ज–गुलरिया सडक सुचारु भएको छ । घटनाको अनुसन्धान सुरु भएको प्रहरीले बताएको छ ।