काठमाडौँ । काठमाडौँ उपत्यकाको फोहर व्यवस्थापनको नेतृत्व गर्ने काठमाडौँ महानगरपालिकामा सधैँ नै फोहरको विषय नै प्रमुख राजनीतिक मुद्दा हुने गरेको छ । 

काठमाडौँ महानगरपालिकाको मेयरमा स्वतन्त्र उम्मेदवारी दिएसँगै बालेन साहले पनि यहाँको फोहरलाई पनि चुनावी अस्त्र बनाएका थिए । काठमाडौँको फोहरको तत्काल र दीर्घकालीन व्यवस्थापनलाई प्राथमिकतामा राख्ने दाबी गरेका थिए ।

साहले मेयरको शपथ लिएको डेढ साता बितेपछि आज पहिलो पटक केही मात्रामा भए पनि काठमाडौँको फोहर उठेको त छ । तर, प्रहरीको बल प्रयोग गरेर । 

सहरी विकास मन्त्रालयले काठमाडौँको फोहर व्यवस्थापन गर्न तयार पारेको बञ्चरेडाँडाबासीले एक दिन अगाडि गरेको सहमतिलाई अस्वीकार गर्दै फोहर बोकेर गएका टिपरहरूलाई रोकेका थिए ।

सिसडोल र बञ्चरेडाँडाका स्थानीयलाई फकाउन निरन्तर ती स्थानमा पुगेका मेयर साहको डेढ साता लामो प्रयास र वाचालाई त्यहाँका स्थानीयले पत्याउन सकेनन् । जसले गर्दा मंगलबार प्रहरीको बल प्रयोग गरेर बञ्चरेडाँडामा फोहर व्यवस्थापन गरिएको छ ।

पहिलो गाँसमा ढुङ्गा भने झैँ पटक पटक स्थानीयबासीलाई मनाउने प्रयासबाट थाकेका मेयर साहले अत्यन्त बल प्रयोग गरेर फोहर व्यवस्थापन गर्नु पर्ने भएको छ ।

मंगलबार फोहर बोकेका कन्टेनरलाई अवरोध गर्न प्रहरीसँग झडपमा उत्रिएका स्थानीयबासी मध्ये केही चोटग्रस्त समेत बनेका छन् । आक्रोशित स्थानीयबासीले मेयर साह उधारो प्याकेज लिएर फकाउन आएको दाबी गर्छन् । भन्छन्, ‘मेयर फकाउँछन्, सरकार बल प्रयोग गर्छ । हामी आफ्ना जायज माग पुरा नभएसम्म फोहर फाल्न दिँदैनौँ ।’

सोमबार मात्रै सहरी विकास मन्त्री रामकुमारी झाँक्रीले काठमाडौँको फोहर व्यवस्थापनका लागि स्थानीय बासिन्दा, जनप्रतिनिधि लगायत सरोकारवालाहरूसँग छलफल गरेकी थिइन् । सो बैठकले स्थानीय माग सम्बोधन गरेर आजैदेखि बञ्चरेडाँडा ल्यान्डफिल्ड साइडमा फोहर व्यवस्थापन गर्ने निर्णय गरेको थियो ।

सो छलफलको क्रममा फोहरबाट प्रभावित स्थानीय तहका प्रमुखहरूले स्थानीयबासीको मागलाई हलुकासँग नलिन आग्रह गरेका थिए ।
छलफलमा धादिङको धुनीबेंशी नगरपालिकाका प्रमुख बालकृष्ण आचार्यले बञ्चरेडाँडा ल्याण्डफिल्ड साइड व्यवस्थापन सबैको साझा दायित्वको विषय भएको र यसका व्यावहारिक पक्षमा ध्यान दिन आवश्यक रहेको भनाइ राखेका थिए । साथै उनले साइडमा फालेको फोहर उचितरूपमा व्यवस्थापन गर्नुपर्ने अवगत पनि गराएका थिए ।

एक दिन अघि सबैका अगाडि काठमाडौँको फोहर व्यवस्थापनमा सहमति जनाएका धुनीबेंशी नगरपालिकाका मेयर आचार्य त्यसको भोलिपल्टै आफूले गरेको सहमतिबाट पछाडि हटेका छन् । पालिका खबरसँग कुरा गर्दै उनले भने, ‘हिजो भएका सहमति सार्वजनिक भएकै छन् । आज के भयो मलाई थाहा छैन । काठमाडौँ कै मेयरलाई सोध्नु होला नि ।’

यति भन्दै आफू व्यस्त भएको बहाना बनाउँदै उनले फोन समेत काटे ।

बैठकमा सहभागी नुवाकोटको ककनी गाउँपालिकाका अध्यक्ष सुमन तामाङले सरकारले फोहर व्यवस्थापनको नीति मात्र बनाउने तर, कार्यान्वयनमा गर्ने गरेको बताएका थिए । साथै उनले शिक्षा, स्वास्थ्य र रोजगारी राज्यको दायित्वअन्तर्गत पर्ने भएकाले आयोजना प्रभावितलाई सरकारले विशेष सम्बोधन गर्नुपर्ने समेत बताएका थिए ।

बैठकमा उपस्थित मेयर साहले समेत निर्णयमा सहमति जनाएका थिए । तर, उनले सहजरुपमा आज काठमाडौँको फोहर व्यवस्थापन गराउन सकेनन् । दुर्गन्धित बनेको काठमाडौँको फोहर स्थानीयको विरोध हुँदा हुँदै जबरजस्ती धादिङबासीको आँगनमा फाल्न उनी बाध्य बनेका छन् ।

यस विषयमा मोबाइलमा सम्पर्क गरेर कुरा गर्न खोज्दा मेयर साहले समेत बोल्न चाहेनन् । उनी बैठकमा व्यस्त भएको बहाना बनाउँदै उनको सचिवालयका कर्मचारीले उनलाई मोबाइल दिएनन् ।

हरेक निर्णयमा पारदर्शी बन्छु भनेर मत मागेका मेयर साहले मिडियासँग समेत दुरी बढाउन थालेपछि कसरी पारदर्शी बन्लान् ?  महानगरपालिकाको वेभ साइटमा राखिएको मोबाइल नम्बरमा फोन गर्दा सचिवालयका कर्मचारीले उठाउँछन् भने उनी कसरी जनतासँग नजिक हुन सक्लान् ?