असार २१, २०७९
बाजुराको बुढीगंगा नगरपालिकामा असार २३ गते (बिहीबार) हुने निर्वाचनको तयारी पूरा भएको मुख्य निर्वाचन अधिकृतको कार्यालय बाजुराले जनाएको छ ।
निर्वाचनको लागि १९ जना मतदान अधिकृत र १९ जना सहायक मतदान अधिकृत र सहायक कर्मचारी गरी ९५ जना कर्मचारी खटाइएको मुख्य निर्वाचन अधिकृत माधवप्रसाद घिमिरेले जानकारी दिए ।
१९ मतदान अधिकृतमध्ये एक जना महिला मतदान अधिकृत खटाइएको छ । जिल्ला अस्पताल बाजुरामा कार्यरत धनकला थापालाई बुढीगंगा नगरपालिका–१ धुरालसैन मतदान केन्द्र ‘क’ मा मतदान अधिकृतका रूपमा खटाइएको छ ।
मतदान अधिकृत र सहायक मतदान अधिकृतलाई प्रशिक्षणपछि मतदान केन्द्रमा पठाइएको हो ।
वैशाख ३० गते भएको स्थानीय तहको निर्वाचनअन्तर्गत बुढीगंगामा निष्पक्ष र स्वतन्त्र वातावरणमा मतदान नभएपछि निर्वाचन आयोगले पुनः निर्वाचन गर्ने निर्णय गरेको थियो ।
सर्वदलीय बैठकमा असार २३ गते बुढीगंगामा पुनः निर्वाचन गर्ने सहमति भएको थियो ।
बुढीगंगाका वडा नम्बर २, ३, ५ र ९ वडामा नेकपा एमालेका नेता तथा कार्यकर्ताले बुथ कब्जा गरेको आरोप लगाउँदै नेपाली कांग्रेसले पुनः मतदान गर्न माग गर्दै आएको थियो ।
एमालेले भने कुनै पनि वडामा बुथ कब्जा नभएको र स्वतन्त्र रूपमा मतदान भएको भन्दै पुनरावेदन र सर्वोच्च अदालतमा रिट दायर गरेको थियो ।
निर्वाचनको लागि सुरक्षा व्यवस्था कडा बनाइएको जिल्ला सुरक्षा समिति बाजुराले जनाएको छ । १९ वटै मतदान केन्द्रमा नेपाल प्रहरी, सशस्त्र प्रहरी र नेपाली सेना खटाइएको छ ।
फागुन १९, २०८०
माघ २५, २०८०
चैत १९, २०८०
चैत १९, २०८०
चैत २२, २०८०
चैत १८, २०८०
