संघीय सरकारले साठी वर्ष उमेर पुरा नगरेका विधवा र ख वर्गका अति अशक्त अपाङ्गता भएकाहरुको सामाजिक सुरक्षा भत्ता उपलब्ध गराउन सर्कुलर गरेको छ । मन्त्रिपरिषद्ले जेठ २२ गरेको निर्णय कार्यान्वयनका लागि सबै स्थानीय सरकारहरुलाई राष्ट्रिय परिचयपत्र तथा पञ्जीकरण विभागले सर्कुलर जारी गरेको हो ।

सर्कुलर गरिएको पत्रमा भनिएको छ, ‘विषम परिस्थितिलाई मध्यनजर गरी साविकमा सामाजिक सुरक्षा भत्ता खाई पाई आएका साठी वर्ष उमेर पुरा नगरेका विधवा र अति अशक्त अपाङ्गता (ख वर्गको अपाङ्गता परिचयपत्र) भएका लाभग्राहीहरूलाई आर्थिक सहायता उपलब्ध गराउनुहुन अनुरोध छ ।’

निर्णयपछि सामाजिक सुरक्षा भत्ता प्राप्त गरिरहेका साठी वर्ष उमेर पुरा नगरेका विधवा महिलालाई मासिक २ हजार अति अशक्त अपाङ्गता भएकाहरुलाई मासिक १ हजार ६ सय पाउने भएका हुन् ।

सरकारले बजेट ल्याउनु अघि विधवा र ख वर्गका अपांगता भएकाहरुको भत्ता रोक्ने भनेपछि चर्काे विरोध आएको थियो । विरोधपछि सरकारले भत्ता दिनेभएपनि यो सामाजिक सुरक्षा ऐन विपरित हुने जानकार बताउँछन् । बरु सरकारले सामाजिक सुरक्षा ऐन संशोधन गरेर भत्ता दिन विज्ञहरुको सुझाव पनि छ ।