फागुन १३, २०८०
सोलुखुम्बु - लिखुपिके गाउँपालिकाको न्यायिक समितीले चालु आर्थिक वर्षमा दुई वटा मात्रै मुद्दाको छिनोफानो गरेको छ । समितिमा चालु आवमा ९ वटा मुद्दा दर्ता भए पनि दुई वटा मात्रै फछ्र्यौट गरेको हो ।
गाउँपालिकाका उपाध्यक्ष तथा न्यायिक समितिका संयोजक ङवाङ ल्हाक्पा शेर्पाका अनुसार पालिकामा आएका मुद्दालाई मेलमिलापमार्फत छिनोफानो गराउनका लागि केही मुद्दाको मात्रै फछ्र्यौट गरेको हो । मेलमिलापकर्तामार्फत दुबै पक्षलाई समझदारीमा ल्याई मेलमिलाप गराउनका लागि न्यायिक कार्य थाती राखेको उनले पालिकाखबरलाई सुनाए ।
सोका लागि गाउँपालिकाले माघ महिनामै पालिकाभित्रका सबै वडामा ५ जना मेलमिलाप सहजकर्तासहित वडागत मेलमिलाप केन्द्र गठन गरिसकेको उनले सुनाए । केन्द्र स्थापना गरेसागै दुई वटा मुद्दा मेलमिलापमार्फत छिनोफानो गरिसकेको उनले बताए ।
गाउँपालिकाले मेलमिलापसम्बन्धी ४८ घण्टे तालिम दिएसँगै केन्द्र गठन गरेको उनको भनाइ छ । गत वर्ष नै गाउँपालिकामा मेलमिलापसम्बन्धी तालिम सञ्चालन गर्नेृ भनिए पनि बजेट अभाव हुन नसकेको उनले सुनाए । तर चालु आवमा बजेटको निकासा गरी सो कार्यक्रम सञ्चालन गरिसकेको उनले सुनाए ।
मेलमिलापकर्ताले दुबै पक्षलाई जीतको महसुस गराउने भएकोले गाउँपालिकाले प्राथमिकतामा राखेको उनको भनाइ छ । उनका अनुसार न्यायिक समितिमा सामान्य झगडा, लेनदेन, घरायसी हिंसा लगायत विभिन्न मुद्दा दर्ता हुने गरेका छन् । मेलमिलाप केन्द्रले गर्न नसकेको मुद्दा मात्रै न्यायिक समितिमा आउने उनले सुनाए ।
फागुन २९, २०८०
फागुन २९, २०८०
फागुन २८, २०८०
कात्तिक १४, २०८१
