जुम्ला– नेकपा एमाले केन्द्रीय सदस्यमा जुम्लाबाट तिला गाउँपालिका अध्यक्ष रतननाथ योगी मनोनीत भएका छन् । एमालेको चिवतनमा सम्पन्न १०औँ महाधिवेशनमा केन्द्रीय सदस्यको उम्मेदवार घोषणा गरे पनि सहमतिमै पदाधिकारी टुंग्याउने भएपछि योगीले उम्मेदवारी फिर्ता लिएका थिए ।

उनीसहित जुम्लाबाट एमाले केन्द्रीय सदस्यमा बलबहादुर महत, धीरेन्द्र गिरी र टेकराज पछाईले उम्मेदवार घोषणा गरेका थिए । पार्टी निर्णयबाट आफू केन्द्रीय सदस्यमा मनोनीत भएको अध्यक्ष योगीले बताए । उनले भने, ‘लामो समयदेखि पार्टीमा योगदान दिएकै कारण सहमतिमै नेतृत्वले केन्द्रीय सदस्यमा मनोनीत गरेको भन्ने सुनेँ ।’ 

विद्यार्थीदेखि एमाले राजनीतिमा होमिएका युवा नेता योगीलाई पार्टीको केन्द्रीय सदस्यमा मनोनीत गरिएको हो । ०७४ को स्थानीय तहको निर्वाचनमा जुम्लाका एक नगरपालिका र सात गाउँपालिकामध्ये तिला पलिकामा एमालेबाट अध्यक्ष योगी मात्रै निर्वाचित भएका थिए ।