चिनियाँ विदेश मन्त्री वाङ यीले नेपाल बसाईको क्रममा राजनीतिक दलका नेता एवं उच्च तहका व्यक्तिहरुसँग भेट गरेका छन् । भेटपछि चिनियाँ विदेश मन्त्रालयले विज्ञप्ति प्रकाशित गरेको छ । चिनिया विदेशमन्त्री वाङ र नेपाली समकक्षी नारायण खड्कासँग शनिबार भएको द्विपक्षीय भेटवार्ताका क्रममा चीनले नेपाललाई तीन विषयमा समर्थन गरेको उल्लेख गर्दै विज्ञप्ति निकालेको छ । 

विज्ञप्तिमा के छ ?
विज्ञप्तिको पहिलो विषय नेपाललाई आफ्नो राष्ट्रिय परिस्थितिअनुकूल विकास मार्ग पहिल्याउनेसम्बन्धी छ । ‘चीनको मैत्रीपूर्ण नीति नेपालका सबै पक्ष र जनताका लागि खुला छ । चीनले नेपालका सबै दल र समूहलाई नेपाली जनताको आधारभूत र दीर्घकालीन हितलाई ध्यानमा राखेर समावेशी, परामर्शदायी, एकताबद्ध र सहयोगी बन्न, राजनीतिक स्थिरता कायम राख्न, आर्थिक वृद्धि प्रवर्द्धनका लागि अनुकूल शासन ढाँचा संयुक्त रूपमा खोजी गर्न समर्थन गर्छ,’ विज्ञप्तिमा भनिएको छ, ‘चीन नेपाली पक्षसँग राज्य शासन र प्रशासनमा अनुभव आदानप्रदानलाई सुदृढ गर्न इच्छुक छ ।’

दोस्रो विषय नेपाललाई स्वतन्त्र स्वदेशी तथा विदेश नीति अवलम्बनमा सहयोग गर्नेसम्बन्धी छ । ‘साना वा ठूला सबै देश समान छन् र सबै देशको सार्वभौमसत्ता, स्वाधीनता र भौगोलिक अखण्डताको सम्मानमा चीनले सधैं जोड दिएको छ,’ विज्ञप्तिमा भनिएको छ, ‘नेपालको मामिलामा नेपाली जनताले नै निर्णय गर्नुपर्छ भन्ने चीनको विश्वास छ । चीनले नेपालको सार्वभौमसत्ता र स्वाधीनतामा खलल पार्ने, नेपालको आन्तरिक मामिलामा हस्तक्षेप गर्ने र नेपालको भूराजनीतिक खेलमा संलग्न हुने प्रयासको विरोध गर्छ ।’ नेपाल अन्य देशसँगको मैत्रीपूर्ण सम्बन्धमा बसेको र क्षेत्रीय तथा अन्तर्राष्ट्रिय मामिलामा ठूलो भूमिका खेलेको देख्दा चिनियाँ पक्ष खुसी रहेको पनि विज्ञप्तिमा उल्लेख छ ।

तेस्रो विषय ‘बेल्ट एन्ड रोड’ सम्बन्धी छ । ‘दुई देशले बेल्ट एन्ड रोडको संयुक्त निर्माणमा सन्तोषजनक प्रगति गरेका छन् । चिनियाँ पक्ष दुई पक्षबीचको मुख्य सहयोग परियोजनाको प्रवर्द्धनलाई तीव्रता दिन, दुई देशबीचको भूमि बन्दरगाहको सहज प्रवाह सुनिश्चित गर्न, सीमापार ऊर्जा सहयोगको विकासको अन्वेषण गर्न, आर्थिक र सांस्कृतिक माध्यमहरूलाई समृद्ध र विस्तार गर्न इच्छुक छ,’ विज्ञप्तिमा भनिएको छ । वाङले नेपाललाई मानव संसाधन, भौगोलिक स्थिति र प्राकृतिक परिस्थितिका फाइदा लिन, चीनका अवसर साझा गर्न र आफ्नो विकास तथा पुनरुत्थानलाई गति दिनका लागि मद्दत गर्न इच्छुक रहेको बताएको पनि विज्ञप्तिमा उल्लेख छ । अन्तर्राष्ट्रिय र घरेलु परिस्थिति जतिसुकै परिवर्तन भए पनि चीनले दुई देशका नेताले तोकेको निर्देशन पालना गर्ने, नेपालप्रतिको मैत्रीपूर्ण नीतिलाई अडिग रूपमा कार्यान्वयन गर्ने, पारस्परिक हितकारी सहयोगलाई मजबुत बनाउने र निर्माणलाई अगाडि बढाउन जोड दिने पनि विज्ञप्तिमा जनाइएको छ ।