काठमाडौं । इंग्ल्यान्डले महिला युरोकप-२०२२ को उपाधि जितेको छ । जर्मनीलाई हराउँदै इंग्ल्यान्ड उपाधि उचाल्न सफल भएको हो ।
वेम्बलीमा गएराति भएको फाइनल खेलमा जर्मनीलाई २–१ गोल अन्तरले हराउँदै इंग्ल्यान्ड च्याम्पियन बन्यो ।
खेलको ६२औँ मिनेटमा इला टोनी गोल गर्दै इंग्ल्यान्डलाई अग्रता दिलाएकी थिइन् ।
७९औँ मिनेटमा जर्मनीका लिना मागुलले गोल गर्दै खेललाई बराबरीमा ल्याइन् ।
निर्धारित ९० मिनेटकाे समय १–१ गोलको बराबरीमा सकिएपछि खेल अतिरिक्त समयमा गएको थियो ।
११० औं मिनेटमा च्लोए केलीले गरेको गोल नै इंग्ल्यान्डको जितमा निर्णायक बन्यो ।
जितसँगै इंग्ल्यान्डले पहिलो पटक महिला युरोकपको उपाधि जितेको छ ।