अन्तर्राष्ट्रिय मैत्रीपूर्ण फुटबलअन्तर्गत बुधबार बिहान भएको खेलमा अर्जेन्टिनाले जमैकामाथि ३–० गोल अन्तरको जित निकालेको छ ।
अर्जेन्टिनालाई जित दिलाउने क्रममा लियोनेल मेस्सीले ८६ औं र ८९ औं मिनेटमा गोल गरे । त्यसअघि खेलको १३ औं मिनेटमा नै जुलियान अल्भारेजले गोल गर्दै टोलीलाई अग्रता दिलाएका थिए ।
जमैकाविरुद्ध दुई गोल गरेसँगै मेस्सी अन्तर्राष्ट्रिय फुटबलमा सबैभन्दा धेरै गोल गर्ने तेस्रो खेलाडी बनेका छन् । उनले अन्तर्राष्ट्रिय फुटबलमा अर्जेन्टिनाको लागि ९० गोल गरेका छन् ।
यो सूचीमा पोर्चुगलका क्रिस्टियानो रोनाल्डो सबैभन्दा अघि छन् । उनले ११७ गोल गरेका छन् । दोस्रो स्थानमा रहेका इरानका अलि डाइएले १०९ गोल गरेका छन् ।