नवलपरासी– बर्दघाट सुस्ता पश्चिममा पर्ने हुलाकी मार्ग जोड्ने दुई वटा पहुँच मार्गको स्तरोन्नति कार्य अगाडि बढिरहेको छ । प्रदेश ५ अन्तर्गतको भौतिक पूर्वाधार विकास मन्त्रालयलले चालू आव ०७७-७८ मा पनि सो सडक स्तरोन्नतिको कामलाई निरन्तरता दिएको हो । 

मन्त्रालयको यातायात पूर्वाधार निर्देशनालय अन्तर्गत सडक पूर्वाधार विकास कार्यालय रुपन्देहीका अनुसार पूर्व–पश्चिम राजमार्गअन्तर्गत जिल्लाको सुनवल तुरिया–पर्सावल–अमरौट–घिनाहा–बकेना सडक र स्थानीय तह पहुँच मार्गअन्तर्गत बासा–तुल्सीनगर–तिलकपुर–खोखरपुरा–पटनी–भिमटाडी सडक स्तरोन्नतिले प्राथमिकता पाएको हो । 

सडक स्तरोन्नतिको निर्माणाधीन योजनाअन्तर्गत पर्सावल–अमरौट–घिनाहा–बकेना सडकमा हालसम्म करिब साढे पाँच किलोमिटर बाटो कालोपत्र भइसकेको छ । आगामी आव ०७८÷७९ सम्म करिब १७ करोड खर्च गर्ने लक्ष्य लिइएको उक्त आयोजनामा हालसम्म करिब ७ करोड ५० लाख खर्च भइसकेको सडक पूर्वाधार विकास कार्यालयले जनाएको छ ।

यस आयोजनाका लागि चालू आव ०७७-७८ मा प्रदेश सरकारबाट साढे ५ करोड बजेट विनियोजन भएको छ । कालोपत्रे हुने सडक सुनवल र रामग्राम नगरपालिकाअन्तर्गत पर्दछ । पूर्व–पश्चिम राजमार्गको सुनवलदेखि हुलाकी मार्ग भैरहवा परासी सडक खण्डअन्तर्गत रामग्राम नगरपालिकाको तोनवासम्म कालोपत्र हुने भएपछि स्थानीयलाई सहज हुने अपेक्षा गरिएको रामग्राम नगरपालिका प्रमुख नरेन्द्रकुमार गुप्ता बताउँछन् । 

यसैगरी पूर्व–पश्चिम राजमार्गअन्तर्गत सरावल गाउँपालिका तिकलपुरको बासा बासही हुँदै गाउँपालिकाको प्रमुख प्रशासनिक भवनसम्म जोड्ने पहँुच मार्ग विस्तारको कार्य पनि जारी छ । बासा–तुल्सीनगर–तिलकपुर–खोखपुर–पटनी–भिमटाडी हँदै करिब ८ किलोमिटर सडक कालोपत्र विस्तार गर्ने निर्माणाधीन आयोजनामा हालसम्म करिब ४ करोड खर्च भएको छ । यस आयोजनाका लागि चालू आव ०७७-७८ मा प्रदेश सरकारबाट ४ करोड बजेट विनियोजन भएको छ । 

आगामी आव ०७८-७९ सम्म आयोजनालाई सम्पन्न गर्ने लक्ष्य लिइए पनि यसलाई भारतीय सीमा जोड्ने गरी विस्तार गर्ने योजना रहेको सडक पूर्वाधार विकास कार्यालयले जनाएको छ । सो योजनाबाट जिल्लाको ग्रामीण क्षेत्र सडक पहुँच विस्तारमा टेवा पुग्ने विश्वास लिइएको सरावल गाउँपालिका अध्यक्ष राधेश्याम चौधरी बताउँछन् ।

प्रदेश ५ अन्तर्गतको भौतिक पूर्वाधार विकास मन्त्रालयले पश्चिम नवलपरासीको हुलाकी मार्ग जोड्ने यी दुई वटा प्रमुख पहुँच मार्गको स्तरोन्नति कार्यलाई प्राथमिकता दिएपछि यहाँका स्थानीय खुसी छन् ।