ताप्लेजुङ– लिफ्ट चढेर एक तल्लाबाट अर्को तल्ला पुगेको अनुभव गर्न नपाएकाहरुलाई अब ताप्लेजुङको पाथीभरा याङ्वरक गाउँपालिकाको प्रशासनिक भवनले त्यो अनुभव गराउने भएको छ ।
 
पाथीभरा याङ्वरक गाउँपालिकाले लिफ्टसहितको सुविधा सम्पन्न प्रशासनिक भवनको निर्माण कार्य सुरु गरेको हो । तत्काललाई २ तले १६ कोठे भवन ३ करोड ८१ लाखको लागतमा सम्पन्न हुने गरी सुरुआत गरिएको गाउँपालिका अध्यक्ष केशरकुमार सुब्बाले जानकारी दिए ।

योजनाको लागत इष्टिमेट भने करिव ४ करोड ५० लाख रुपैंयाको थियो । गाउँपालिका अध्यक्ष सुब्बले भवन निर्माण कार्यको शिलान्यास गरेका छन् ।

अहिले रहेको प्रशासनिक केन्द्र भन्दा करिव १० मिनेट माथि अहिले स्वास्थ्य केन्द्र रहेको भवन छेउ पाथीभरा याङ्वरक गाउँपालिकाको नयाँ प्रशासनिक भवन बन्ने भएको छ ।

एक नगरपालिका सहित ताप्लेजुङका सबै ९ स्थानीय तह अहिले सम्म भाडाका भवनमा बस्दै आएका छन् । फुङ्लिङ नगरपालिकाको भवन वडा नं ७ मा निर्माणाधिन अवस्थामा छ ।

नगरपालिका पछि भवन निर्माण कार्य सुरु गर्ने पाथीभरा याङ्वरक गाउँपालिका पहिलो र समग्रमा भने दोस्रो भएको छ । गाउँपालिका अध्यक्ष मेन्याङ्वोले लिफ्टसहितको सुविधा भएको भवन निर्माण गर्ने स्थानीय तह भने पाथीभरा याङ्वरक पहिलो हुने वताए ।

अबको १५ महिना भित्रमा भवन निर्माण कार्य पूरा हुने गाउँपालिकाका प्रमुख प्रशासकीय अधिकृत लोकप्रसाद फागोले जानकारी दिए । ताप्लेजुङमा अहिले सम्म लिफ्ट सहितको सुबिधा भएको भवन छैनन् ।