जुम्ला– कर्णाली प्रदेशको मुकाम वीरेन्द्रनगर सुर्खेतपछिको दोस्रो ठूलो सहर जुम्ला सदरमुकाम खलंगा अर्थात् चन्दननाथ नगरपालिका हो । संघीयतापछि कर्णाली प्रदेशको मुकाम सुर्खेत गर्ने कि जुम्ला भन्ने विषयमा नेताहरूबीच मतभेद भएको थियो । प्रदेशकै राजधानी अर्थात् मुकाम जुम्लाको खलंगा बनाउनुपर्छ भन्दै गर्दा यहाँका सडक, ढल निकास सुधार्न नेता र सरोकारवाला निकायले बुझेनन् ।

अहिले यहाँका सडक जताजतै हिलाम्य हँुदा नागरिकलाई ओहोरदोहर र सवारीसाधन सञ्चालनमा समस्या हुने गरेको छ । संघीयतापछि स्थानीय सरकार सञ्चालनको चार वर्ष बितिसक्दा पनि जुम्लाको मुकाम खलंगाभित्रका हिलाम्ये सडक अझै सुधार हुन सकेनन् ।

नेपाल टेलिकम हुँदै सिंगाचौर सडक, पत्रकार महासंघ हुँदै सिंगाचौर सडक, टेलिकम अगाडि विजयनगर हुँदै बसर्पाक जाने सडकलगायत चन्दननाथका दर्जनौँ भित्री सडक वर्षौंदेखि हिलाम्य छन् ।

चन्दननाथ नगरपालिका ८, ९, १० नम्बर वडाका गाउँ पुग्ने सडक पनि हिलाम्य नै छन् । नगरपालिकाभित्रकै कर्णाली भनेर चिनिने वडा नम्बर ८ मा सञ्चार, विद्युत् तथा सडकको विकास अझै हुन सकेको छैन । गाउँ पुगेका तथा सदरमुकामभित्रका कच्ची सडक सुधार तथा स्तरवृद्धिमा नगरपालिकाको ध्यान नपुग्दा स्थानीयलाई सकस हुँदै आएको छ ।

चन्दननाथ नगरपालिका वडा नम्बर ४ का पेमा लामाले भने, ‘न राम्रो सडक, न त नियमित पानी आउने । हिलाम्ये सडकले आउजाउमा मुस्किल छ । जनप्रतिनिधिको कार्यकाल सकिन लागिसक्यो । सडक सुधार हुने टुंगो छैन । नगरपालिकालाई कर तिर्न मन लाग्दैन ।’

पत्रकार महासंघ हुँदै भित्र जाने सडकमा घर भएका लामा चन्दननाथका भित्री सडकमा हिउँदमा धुलो र बर्खामा हिलोले सास्ती खप्नुपरेको बताउँछन् । यो सडक बाह्रैबास हिलाम्य हुने गरेको छ । केही दिनयता नियमित वर्षा भएपछि नगरपालिकाका आधा दर्जन भित्री सडक हिलाम्ये छन् ।

टेलिकम अगाडिको सडक कालोपत्रे गरेको एक वर्ष नबित्दै हिलोले पुरिएको छ । नगरपालिकाले नाली व्यवस्थापनदेखि हिलाम्ये सडकलाई आरसिसीसम्म गर्न सकेको छैन । सोही कारण हिलाम्ये सडकबाट आउने हिलोले कालोपत्रे पुरिएको हो ।

गाउँ–गाउँका सडक आरसिसी भइसक्दासमेत स्मार्ट सिटी बनाउने सपना बाँडिएको नगरपालिकाका भित्री सडक हिलाम्ये रहिरहनु अनुचित भएको नागरिक अगुवा राजबहादुर महत बताउँछन् । सडक, बत्ती, खानेपानीजस्ता आधारभूत विकासमा नगरपालिकाको ध्यान जानुपर्नेमा त्यसो हुन नसकेको उनको भनाइ छ ।

वडा नम्बर ६ का वडाध्यक्ष अजबहादुर रावलले विजयनगर र पत्रकार महासंघ हुँदै एमाले पार्टी कार्यालयसम्मको सडक स्तरवृद्धि गर्न गत वर्ष नै ठेक्का भएको जानकारी दिए । तर, नगरपालिकाकै ढिलासुस्ती, निर्माण व्यवसायीलाई ताकेता नदिएकै कारण ढिलाइ भएको उनको भनाइ छ । उनले भने, ‘टेन्डर भएको १ वर्ष भयो । काम भएको छैन । कार्यान्वयन तहमा हामी नहुँदा काम गर्न गाह्रो छ ।’ 

चन्दननाथका इन्जिनियर लोकेन्द्र महतले विजयनगर–पत्रकार महासंघदेखि भित्री सडक चाँडै स्तरवृद्धि हुने बताए । उनले भने, ‘विजयनगरमा एक साइट नाला र अर्को साइटमा क्यारी निर्माण हुनेछन् । पत्रकार महासंघभित्रको सडक आरसिसी हुँदै छ ।’ इन्जिनियर महतले गत वर्ष करिब ४० लाख रुपैयाामा टेन्डर भए पनि लकडाउन र बर्खाले काम रोकिएकाले तत्काल काम सुरु गर्न पत्राचार गरिएको दाबी गरे ।