उदयपुर– स्थानीय तहले बर्खामास भत्किएका सडक दसैँअघि टालटुल गरी सञ्चालनमा ल्याए पनि केही दिनअघिको वर्षाले क्षतविक्षत बनाएको छ । हालैको बेमौसमी वर्षाले अन्तरपालिका सडकमा ठूलो क्षति पुर्याएको हो । पालिकाहरूले विभिन्न शीर्षकको बजेट काटेर जिल्लाका सबै ग्रामीण सडकमा दसँैमा यातायात सञ्चालन गरे पनि लगत्तैको बेमौसमी वर्षाले क्षतिग्रस्त बनेका छन् । बेमौसमी वर्षापछि आएको बाढीपहिरोले गन्तव्यमा पुगेका तथा फर्किदै गरेका आधा दर्जन बढी यात्रुवाहक बस बाटोमै अलपत्र परेका छन् ।
सडकमा यात्रु लिएर गएका बस गन्तव्यमा फर्किन नपाउँदा यातायात व्यवसायी चिन्तित बनेका छन् । पहिरोले सडक क्षतविक्षत बनेकाले बस ल्याउन नसकिएको उनीहरू बताउँछन् ।
वर्षाले अधिकांश ग्रामीण सडक क्षतिग्रस्त बनाउँदा दसैँ मानेर सहर फर्किनेहरूले सास्ती बेहोर्नुपरेको छ । पहाडी भेगका सडक ध्वस्त भएपछि यात्रुवाहक तथा मालवाहक सवारीसाधन बाटोमै अलपत्र परेको हुन् ।
निरन्तरको वर्षाले सडक भत्काउनुका साथै पहिरोले पुरेपछि सवारीसाधन बाटोमै थुनिनुपरेको हो । वर्षाले सडक बिगारेपछि सदरमुकाम र गाउँबीचको नियमित यातायात आउजाउ रोकिन पुगेको छ भने बीच बाटोमा थुनिएका सवारीसाधन निकाल्न सडक मर्मतमा व्यवसायी आफैं लागेका छन् ।
वर्षाले भत्काएपछि गाईघाट–मुर्कुची–पुँवारे–भुटार–लाफागाउँ खण्डको सडकमा रोकिएका दुई यात्रुवाहक बस केही दिनयता रोकिएका छन् । ती बस निकाल्न सोमबार मात्र सदरमुकामदेखि स्काभेटर पठाइएको हिमाली केन्द्रका महासचिव उमेश बस्नेतले बताए ।
बीच बाटोमा अड्किएका २/३ वटा बस तथा ट्रयाक्टर एक दिनअघि निकालिएको छ । यातायात व्यवसायीले आफ्नै खर्चमा स्काभेटर लगेर सडक मर्मत गरी थुनिएका बस र ट्रयाक्टर निकाल्न थालेको बस्नेतले जानकारी दिए ।
लाफागाउँ–जाँते खण्डको सडक दुवैपट्टि भत्किएर आउजाउ रोकिएपछि दुई बस सडकमै अलपत्र परेका छन् । सडक बिग्रेर बस बीच बाटोमै रोकिएपछि यात्रुहरू पैदल हिँडेरै गन्तव्यतिर लागेका छन् । बस भने त्यहीँ रोकिएका छन् ।
बिग्रेका सडक मर्मत गर्ने क्रम चलिरहेकाले बस निकाल्न केही दिन लाग्न सक्ने बस्नेतले बताए । धेरै ठाउँमा सडक बिग्रे÷भत्केकाले निर्माण गर्दै जाँदा समय लाग्न सक्ने उनको भनाइ छ ।
बस रोकिएको ठाउँ भुटारदेखि २०/२५ किलोमिटर उत्तरमा पर्दछ । तर, स्काभेटर त्यहाँसम्म पुग्न आधा दर्जन बढी ठाउँमा मर्मत गर्नुपर्ने भएकाले समय लाग्न सक्ने भएको हो ।
स्थानीय तहहरूले मर्मत गर्नुपर्ने सडक समयमै नगर्दा व्यवसायी र यात्रु दुवैलाई सास्ती भएको छ । गाउँ–गाउँमा सरकार भए पनि दायित्व पूरा गर्नेतर्फ जनप्रतिनिधिले चासो नदिँदा सडकको दुरवस्था कायमै रहेको व्यवसायी बताउँछन् ।
व्यवसायीका अनुसार वर्षाले सदरमुकामसँगै जोडिएका थुप्रै पहाडी भेगका सडक कामै नलाग्ने गरी भत्किएका छन् । पहाडका सडक बिनाइन्जिनियरिङ बनेका र कच्ची भएकाले सामान्य वर्षाले नै भत्काएर यातायात अवरुद्ध हुन गर्छ ।
धेरैजसो सडक माटो काटेर मात्र बनेका कारण सामान्य वर्षामै बगेर भत्कने गरेका छन् भने कतिपय सडकमा नाला नहुँदा बीच भागम पानी जमेपछि गाडी चल्न नसक्ने अवस्थामा पुगेका छन् ।
छिमेकी खोटाङलाई सोझो यातायातले जोड्ने गाईघाट–दिक्तेल सगरमाथा लोकमार्ग ठाउँ–ठाउँमा भत्किँदा यातायात अवरुद्ध हुन पुगेको छ भने त्यससँग जोडिएका शाखा–उपशाखा सडक सबै बिग्रिएपछि यातायात अवरुद्ध हुन पुगेको हो ।
गाईघाट–दिक्तेल सडकसँग जोडिएर उदयपुरका साविक खाँबु, रौता, आँपटार, रसुवा, बलम्ता, जाँते, ताम्लीछा जोडिएका कच्ची सडक सबै भत्किएर आवागमनमा कठिनाइ भएको छ । त्यस्तै, लिमचुङबुङ गाउँपालिका र रौतामाईका आन्तरिक सडक पनि भत्किएका छन् ।
ताप्ली र उदयपुरगढी गाउँपालिकाका आन्तरिक सडक पनि अस्तव्यस्त छन् । वर्षाले आन्तरिक सडक भत्काएका कारण ताप्ली गाउँपालिका केन्द्र रुपाटारसम्म पुग्नसमेत हम्मे हुने गरेको पालिका अध्यक्ष उद्धवसिंह थापाले बताए ।