उदयपुर–    उदयपुरको त्रियुगा नगरपालिकाले चालू आर्थिक वर्षका लागि बनाएको सडक ग्राभेल योजना सुरु गरेको छ । नगरपालिकाले चालू आर्थिक वर्षको विनियोजन बजेटबाट नगरका १६ वटै वडामा सडक ग्राभेल गर्ने कार्यक्रम वडा नम्बर ५ देउरीबाट सुरु गरेको हो । 

त्रियुगा नगरपालिकाले स्वास्थ्य, शिक्षित, उद्यमशील हाम्रो सहर : समुन्नत समावेशी समृद्ध त्रियुगा नगर नारालाई आत्मसात् गर्दै सडक ग्राभेल योजना अघि सारेको हो । नगरभित्रका सडकमा नाला र ग्राभेल गर्ने काम बाँकी रहेका ठाउँमा सबै वडामा तत्काल सुरु गर्न लागिएको नगरप्रमुख बलदेव चौधरीले जानकारी दिए ।

सहरसँग जोडिएको गाउँलाई सहर बनाउने योजनाअनुरूप सडक कालोपत्रे उद्घाटन गर्दै नगरप्रमुख चौधरीले यस्तो बताएका हुन् । ‘नगरको सबै वडा सहर बनाउने हाम्रो योजना छ । भोलिका दिनमा गाउँ रहँदैन । सबै सहर हुने भएकाले गाउँ–गाउँमा रहेका स–साना सडकलाई ग्राभेल तथा पिच गर्ने योजना छ । सडक ग्राभेल नगरपालिकाको महत्त्वपूर्ण अभियान हो’, नगरप्रमुख चौधरीले भने ।

गाउँ–गाउँका स–साना सडक निर्माण गरी सहर बनाएर नगरलाई उपमहानगर बनाउने योजना रहेको चौधरीले जानकारी दिए । उपप्रमुख देवीकुमारी चौधरीले गाउँ–गाउँमा रहेका साना सडकलाई ग्राभेल गर्ने योजनाअनुरूप देउरीबाट सुरु गरिएको बताइन् । 

सडक ग्राभेल गर्न सडक क्लियर भएको हुनुपर्ने र ८ मिटरको हुनुपर्ने उनको भनाइ छ । नगरपालिकाले सबै वडामा सडक कालोपत्रेका लागि ४ करोड रुपैयाँ विनियोजन गरेको छ । कार्यक्रममा प्रमुख प्रशासकीय अधिकृत पुरुषोत्तम ढकाललगायत उपस्थित थिए ।