पाल्पा– पाल्पाको तानसेन नगरपालिका–५ कैलाश नगरमा श्रीनगर सांस्कृतिक डबलीको निर्माण कार्य अन्तिम चरणमा पुगेको छ । पाल्पाका कला संस्कृति तथा ऐतिहासिक पक्षको प्रचारप्रसार गरी पर्यटक भित्रियाउन प्रदेश सरकारको योजना अनुसार काम अगाडि बढाएको बताइएको छ । यसका लागि लुम्बिनी प्रदेश सरकारले  ६ करोड ८२ लाख ५६ हजार ९१ रुपैयाँ बजेट विनियोजन गरेको छ । प्रतिष्ठा कन्स्ट्रक्सन कम्पनी प्रालि काठमाडौँले डबलीको काम थालेको हो । 

पाल्पामा निर्माणाधीन डबली सञ्चालनमा आएपछि यहाँको कला, संस्कृतिको संरक्षण तथा पर्यटक प्रवद्र्धनमा सहयोग पुग्नेछ । रोजगारीका अवसर सिर्जना हुने, कला, संस्कृतिको प्रदर्शनीले पर्यटकको आगमनमा वृद्धि हुने लुम्बिनी प्रदेशका ऊर्जा, जलस्रोत तथा सिंचाइ मन्त्री वीरबहादुर रानाले बताए । 

नयाँ पुस्ताका युवाले बिर्सिएको कला, संस्कृतिसम्बन्धी डबलीमार्फत ज्ञान अभिवृद्धि हुने र कला, सस्कृतिसँग जोडेर स्थानीयवासीको आयआर्जन हुने तानसेन नगरपालिकाका नगर प्रमुख अशोककुमार शाहीले बताए । विसं २०७६ असार ८ गते काम सुरु गरी विसं २०७८ असार ७ गते सम्पन्न गर्ने सम्झौता भएपनि निर्माण कम्पनीले कोभिडका कारण देखाएर आलटाल गरिरहेको बताइएको छ । अबको तीन महिनाभित्र सबै काम पूरा हुने बताइएको छ । निर्माण सम्बन्धी सबै काम पूरा भएको र केही सामान्य काम मात्र बाँकी रहेको निर्माण कम्पनीका प्रतिनिधि दीपक पालले बताए । 

पर्यटकीय गन्तव्यका रुपमा परिचित पाल्पामा रानी महल, पाल्पा दरबार, भैरव मन्दिरलगायतका ऐतिहासिक सम्पदा अवलोकन गर्न पर्यटक पाल्पामा घुमफिर गर्छन् । यो डबलीबाट पाल्पाका विभिन्न जातजातिको कला, संस्कृति प्रदर्शन गरेर पर्यटन आकर्षण गरी जिल्लामा पर्यटकको चहलपहल ल्याउन थालिएको हो ।