काठमाडौं–मेलम्चीको पानी अस्थायी संरचनामार्फत ल्याउन आयोजना स्थलसम्म सडक खोलिएको छ । वर्षाका कारण अवरुद्ध सडक मेलम्ची खानेपानी विकास समितिले स्थानीय पालिकासँगको समन्वयमा अस्थायी रूपमा मर्मत गरेको हो ।

अहिले तत्कालै आवश्यक उपकरण र सवारीसाधन लैजान अस्थायी रूपमा सडक निर्माण गरिएको समितिले जनाएको छ । अहिले निर्माण भएको सडक आगामी वर्ष नै बाढीले क्षतिग्रस्त गर्न सक्ने समितिका सूचना अधिकारी राजेन्द्रप्रसाद पन्तले बताए । 

उनका अनुसार तत्काल अस्थायी रूपमा पानी चलाउन सडक निर्माण गरिएको हो । अहिले निर्माण भएका सडक र पुल दुवै तत्कालका लागि र अस्थायी प्रकृतिको भएको उनले जानकारी दिए । उनले भने, ‘अहिले भर्खर आयोजनाका संरचना मर्मत गरेर सञ्चालन गर्न मात्रै सडक खोलिएको हो ।’

आयोजना र स्थानीयका लागि पनि सडक दीर्घकालीन रूपमा निर्माण गर्न आवश्यक छ । आयोजनास्थलभन्दा माथिल्लो क्षेत्रबाट पहिरोको जोखिम रहेकाले त्यसको अध्ययन भइरहेको छ । आयोजनामा सहयोग गरेको दातृ संस्था एसियाली विकास बैंकले खानेपानी मन्त्रालयसँगको समन्वयमा अध्ययन गरिरहेको छ । 

अध्ययनका प्रतिवेदन आएपछि त्यसकै आधारमा दीर्घकालीन रूपमा सडक र पुल निर्माणमा जानुपर्ने उनको भनाइ छ । उनले भने, ‘माथिल्लो क्षेत्रको अध्ययन सकिएपछि हामीले अर्काे वर्ष पहिले नै स्थायी निर्माणमा जानुपर्छ ।’

अध्ययन प्रतिवेदन आएपछि त्यसैका आधारमा कति माथिबाट सडक र पुल निर्माण गर्न आवश्यक छ भनी टुंगो लाग्ने सूचना अधिकारी पन्तले बताए । दातृ निकायको अध्ययन टोलीले गरेको अध्ययनमा आगामी वर्ष पनि बाढी आउन सक्ने देखिएको छ । 

अध्ययनको अन्तिम प्रतिवेदनका आधारमा मात्रै स्थायी संरचनाका निर्माणको योजना बनाउन सकिने बताइएको छ । पन्तले भने, ‘अहिले तत्काल हामीले आयोजनाका लागि ठूलो खर्च नगरेर अस्थायी रूपबाट पानी ल्याउन काम गरेका छौँ ।’ उक्त सडक आयोजनास्थलमा पुग्न मात्रै नभएर स्थानीयका लागि पनि आवश्यक छ । गत १ असारमा मेलम्ची नदीमा आएको बाढीका कारण सडकमा क्षति पुगेको थियो ।

कतिपय ठाउँमा नदीले सडक नै कटान गरेकाले मर्मतमा लामो समय लागेको थियो । मंसिर पहिलो साता आएको बाढीले थप क्षति पु¥याएको सडक तत्कालका लागि खुलाइएको हो ।