काठमाडौं– सत्तारुढ नेपाली कांग्रेसको १४औँ महाधिवेशनअन्तर्गत वडा अधिवेशन हुन बाँकी १३ जिल्लामा निर्वाचन अधिकृत तोकिएका छन् ।

प्रदेश २ का ८ जिल्लासहित कैलाली, डोल्पा, बाँके, सुर्खेत र रसुवामा कांग्रेसको वडा अधिवेशन हुन बाँकी छ । कांग्रेस केन्द्रीय निर्वाचन समितिले कैलालीमा यसअघि नै टेकप्रसाद सुवेदीलाई मतदान अधिकृत तोकिसकेको थियो ।

बाँकेमा रेवतीरमण भट्टराई, सुर्खेतमा मदन रेग्मी, रसुवामा सुमनकुमार केसी र डोल्पामा कुमारराज श्रेष्ठलाई निर्वाचन अधिकृत तोकिएको निर्वाचन समितिले जनाएको छ ।

यस्तै, सप्तरीमा डा.रुद्र शर्मा, सिराहामा सञ्जीव लामा, धनुषामा अरुण ज्ञवाली, महोत्तरीमा इन्द्र अधिकारी, सर्लाहीमा विनोद कार्की, रौतहटमा दीपकराज गिरी, पर्सामा नरेन्द्र केसी र बारामा ज्ञानेन्द्रपसाद अधिकारीलाई निर्वाचन अधिकृत तोकिएको
छ ।

निर्वाचन अधिकृत सोमबार तोकिएको जिल्लामा जाने निर्वाचन समितिले बताएको छ । निर्वाचन समितिले वडा अधिवेशन हुन बाँकी जिल्लामा २७ कात्तिकका लागि मिति तोकेको छ ।

२१ हिमाली जिल्लामध्ये १३ जिल्लामा कांग्रेसको जिल्ला अधिवेशन भइसकेको छ भने ६४ जिल्लामा पालिका अधिवेशन पनि सकिएको छ ।

कांग्रेसले पुनः सारेको महाधिवेशनको नयाँ कार्यतालिकाअनुसार १३ जिल्लामा पालिका अधिवेशन ३० कात्तिकमा हुनेछ । ३ मंसिरमा प्रदेशसभा क्षेत्रीय अधिवेशन र ६ मंसिरमा प्रतिनिधिसभा क्षेत्रीय र एक निर्वाचन भएको जिल्लामा अधिवेशन हुनेछ । १० मंसिरमा एकभन्दा बढी प्रतिनिधिसभा निर्वाचन क्षेत्र भएका जिल्लामा अधिवेशन हुने कांग्रेसले बताएको छ ।

हिमाली जिल्ला सोलुखुम्बु, दार्चुला र म्याग्दीमा प्रदेशसभा निर्वाचन क्षेत्रीय अधिवेशन २७ कात्तिक र जिल्ला अधिवेशन १ मंसिरमा हुनेछ । कार्यतालिका प्रभावित नभए २४–२६ मंसिरमा कांग्रेसले १४औँ महाधिवेशन गर्नेछ ।