ललितपुर– ललितपुरको लेले–चन्दनपुर सडक खण्ड अन्तर्गत कोञ्ज्योसोम गाउँपालिका–१ चौघरेस्थित सिँगाने भन्ज्याङदेखि कोञ्ज्योसोम गाउँपालिकाको कार्यालय हुँदै दलचोकीबाट कान्ति लोकपथअन्तर्गत बागमती गाउँपालिका को तीनपाने भन्ज्याङ जोड्ने सडक स्तरोन्नति सहित कालोपत्रेको काम सुरु भएको छ । सोमबार कोञ्ज्योसोम गाउँपालिकाका प्रमुख गोपीलाल सिंतानले कालोपत्रेको उद्घाटन गरे ।
ठेकेदार र कामदारलाई दक्षिणा दिँदै कालोपत्रेको उद्घाटन गरेको अध्यक्ष सिंतानले बताए । बागमती प्रदेश सरकारबाट प्राप्त ४ करोड रकमबाट सडक कालोपत्रेको काम सुरु भएको हो ।
भौतिक पूर्वाधार विकास कार्यालयमार्फत टेन्डर प्रक्रियामा गएको यो परियोजनाको लागि पिएम शान्ति जेबी कम्पनीले काम गरिरहेको छ । एक हप्ताभित्र सबै काम सकिने गाउँपालिका अध्यक्ष सिंतानले बताएका छन् ।
आइतबार सिंतान आफैंले निर्माण सामग्रीहरु सहित सडक कालोपत्रे गर्ने कामको सुरुवात गरे । सडक कालोपत्रे भएपछि दक्षिण ललितपुरका ३ ओटै गाउँपालिका सहज सडक सन्लामा जोडिनेछन् ।