चैत १२, २०८०
माघ ०७, २०७७
लमजुङ- लमजुङको बेँसीसहर नगरपालिकाले ३ वर्षको अवधिमा २९ वटा शाखा रोड कालोपत्रे गरेको छ । नगरपालिकाले लागत साझेदारीमा नगरभित्रका शाखा सडक कालोपत्रे गरेको हो ।
नगरपालिकाको ६० प्रतिशत र उपभोक्ताको ४० प्रतिशत लगानीमा नगरभित्रका शाखा सडक कालोपत्रे गरिएको हो । हालसम्म नगरपालिकाले ३ दशमलव ६ किलोमिटर सडक कालोपत्रे गरेको जनाएको छ ।
आर्थिक वर्ष २०७४/७५ मा लमजुङका ८ वटा, ७५/७६ मा १४ वटा र ७६/७७ मा ७ वटा शाखा सडक कालोपत्रे गरेको नगरपालिकाले जनाएको छ । नगरपालिकाले ७४/७५ मा १ दशमलव ५ किलोमिटर, २०७५/७६ मा १ दशमलव ४७ किलोमिटर र २०७६/७७ मा ० दशमलव ९९ किलोमिटर सडक कालोपत्रे गरेको छ ।
सडक कालोपत्रेमा नगरपालिकाले झन्डै ४ करोड रुपैयाँ बजेट लगानी गरेको छ । नगरपालिकाले शाखा सडक कालोपत्रे गर्न २०७४/७५ मा १ करोड ५० लाख, २०७५/७६ मा १ करोड ६३ लाख ८३ हजार ३ सय १४, २०७६/७७ मा ४३ लाख ९७ हजार ८ सय ६१ रुपैयाँ खर्च गरेको छ ।
साझेदारीमा काम गर्दा उपभोक्ताको अपनत्व हुने भ्रष्टाचार र अनियमितता नहुने भएकाले लागत साझेदारीमा काम गरिएको नगरप्रमुख गुमानसिंह अर्यालले जानकारी दिए ।
नगरपालिकाले चालू आर्थिक वर्षमा पनि ५ वटा शाखा सडक लागत साझेदारीमा कालोपत्रे गर्ने योजना बनाएको छ । सडक कालोपत्रे गर्न चालू आर्थिक वर्षमा नगरपालिकाले ५४ लाख ९८ हजार ३ सय ६९ रुपैयाँ बजेट विनियोजन गरेको छ ।
केही योजना सम्झौता भएर काम सुरु भइसकेको छ भने केही योजना सम्झौता हुन बाँकी रहेको नगरपालिकाले जनाएको छ । स्थानीय सरकार आएपछि लामो समयदेखि कालोपत्रे हुन नसकेका शाखा सडक कालोपत्रे हुँदा स्थानीय खुसी लागेको स्थानीय बुना रिमाल सुनाउँछिन् ।
बेँसीसहरका हरेक शाखा सडक, गल्ली कालोपत्रे भएपछि सहरको सौन्दर्य झनै बढेको छ । यसले पनि स्थानीय सरकार जनताप्रति उत्तरदायी छ भन्ने आभाष नागरिकले गरिरहेका छन् ।
नगरभित्रका हरेक गाउँलाई सडकसँग जोड्ने र बिग्रिएका सडकको स्तरोन्नति गर्दै कालोपत्रे गर्ने योजना नगरपालिकाले बनाएको छ ।
जेठ २४, २०८१
जेठ २१, २०८१
