चैत १२, २०८०
असार १२, २०७८
रूपन्देही– अर्थमन्त्री विष्णु पौडेलले कालीगण्डकी–तिनाउ डाइभर्सन यस क्षेत्रका लागि गेम चेन्जर प्रोजेक्टका रूपमा रहेको बताएका छन् । आयोजनाले यस क्षेत्रको विकासमा कायापलट ल्याउँदै सिंगो मुलुकको मुहार फेर्न महत्त्वपूर्ण भूमिका खेल्ने उनको विश्वास छ ।
कालीगण्डकी–तिनाउ डाइभर्सन बहुउद्देश्यीय परियोजनाको बुटवलमा स्थापना भएको कार्यालयको शनिबार उद्घाटन गर्दै उनले आयोजना सम्पन्न गर्न स्रोत अभाव नहुने प्रतिबद्धता व्यक्त गरे । विद्युत् उत्पादनसँगै रूपन्देही, कपिलवस्तु र नवलपरासीका खेतीयोग्य जमिनलाई सिञ्चित गरी आर्थिक समृद्धिमा महत्त्वपूर्ण उपलब्धि हासिन गर्न सकिने उनको भनाइ छ ।
आयोजनाबारे जानकारी दिँदै अर्थ, गृह, उद्योग, वाणिज्य तथा आपूर्ति, ऊर्जा, जलस्रोत तथा सिँचाइमन्त्रीसमेत रहेका पौडेलले यसबाट १२६ मेगावाट विद्युत् उत्पादन हुने बताए ।
कालीगण्डकी नदीको राम्दी पुलदेखि २ दशमलव ३ किलोमिटर तल रहेको रम्भा गाउँपालिका वडा नम्बर ३ बाट २७ किलोमिटर सुरुङ हुँदै पाल्पाको तिनाउ–३ दोभानमा पानी खसाल्ने योजना छ । सुरुङमार्फत ८२ घनमिटर प्रतिलिटर पानी ल्याएपछि दोभानमा ड्याम निर्माण गरी ५४ मेगावाट विद्युत् उत्पादन गर्ने लक्ष्य
छ ।
दोभानबाट ७ किलोमिटर सुरुङ हुँदै रूपन्देहीको बुटवल उपमहानगर वडा नम्बर १३ बेलबासमा पानी खसाली ७२ मेगावाट विद्युत् उत्पादन हुने अर्थमन्त्री पौडेलले जानकारी गराए ।
कालीगण्डकीबाट ६ दशमलव ५ मिटरको गोलाइ सुरुङ निर्माण गरी पानी ल्याउने योजना छ । उक्त पानीले रूपन्देहीमा ५३ हजार तथा कपिलवस्तुमा ५४ हजार जमिन सिँचाइ गर्ने लक्ष्य राखिएको छ ।
आयोजना सम्पन्न गर्न ६४ अर्ब विद्युत् उत्पादनको क्षेत्रमा तथा ७४ अर्ब सिँचाइको संरचना तयार पार्न खर्च अनुमान गरिएको छ । यसरी आयोजना सम्पन्न गर्न कुल १ खर्ब ३८ अर्ब रुपैयाँ खर्च लाग्ने प्रारम्भिक अनुमान गरिएको छ ।
बुटवलमा आयोजनाको कार्यालय स्थापनासँगै जग्गा अधिग्रहण तथा डिपिआरको काम अघि बढ्नेछ । आयोजनाअन्तर्गत कालीगण्डीमा नियमित वहनका लागि २० घनमिटर प्रतिसेकेन्ड पानी छाडिनेछ ।
जेठ २४, २०८१
जेठ २१, २०८१
